အ
ခု ၂၁ ရာစုမှာ ဒီမိုကရေစီအသံဟာ အာရပ်လောကအပါအဝင် ကမ္ဘာ့နေရာ အနှံ့အပြားမှာ ပိုလို့ကျယ်လောင်လာပါ တယ်။ လူတွေ ဘာဖြစ်လို့ ဒီမိုကရေစီကို လိုချင်ရတာလဲ။ ဘုရင်စနစ် (သို့မဟုတ်) တပါတီစနစ်နဲ့ အုပ်ချုပ်ထားပြီး အေးအေးချမ်းချမ်း စားနိုင်သောက်နိုင် အိုးအိမ်ကောင်းကောင်းနဲ့ နေထိုင်နိုင်မယ်ဆိုရင် ဒီမိုကရေစီ လိုပါဦးမလားလို့ မေးသူတွေလည်း ရှိပါတယ်။ အလုပ်ရှုပ်ခံပြီး ဒီမိုကရေစီကို တောင်းဖို့လိုသေးလားလို့ ဆင်ခြေတက်မယ့် သူတွေလည်း ရှိကောင်းရှိနိုင်ပါလိမ့်မယ်။
စီးပွားရေးကောင်းဖို့က ပထမ ဒီမိုကရေစီဆိုတာ နောက်မှလာလည်း ရပါတယ်လို့ ပြောတဲ့သူတွေထဲမှာ အနောက်တိုင်းက ပညာရှင် ဆိုသူကြီးတွေတောင် ပါပါတယ်။ ဒါပေမယ့် ဒီအဆိုကို သူတို့အနောက်နိုင်ငံက ပြည်သူတွေရှေ့မှာ ဒီပညာရှင်တွေ ပြောင်မပြောရဲပါဘူး။ ဘာကြောင့်လဲဆိုတော့ အနောက်တိုင်းမှာက ဒီမိုကရေစီက အတော်လေး အမြစ်တွယ် ခိုင်မာနေ တာကိုး။ ခိုင်မာအမြစ်တွယ်နေတဲ့ ဒီမိုကရေစီ ပြန်ပြီးလျှော့ပါးသွားမှာကို အဲသည့်ပြည်သူတွေက လက်ခံမှာလည်း မဟုတ်ပါဘူး။ ဒီမိုကရေစီ နောက်မှလာလည်း ရပါတယ်ဆိုတဲ့ စကားကို အဲသည့် ပညာရှင်တွေတချို့က အာရှ၊ အာဖရိကနဲ့ တောင်အမေရိက တိုက်က နိုင်ငံတွေအတွက်သာ ရည်စူးပြောတာ ဖြစ်ပါတယ်။ ဒီမိုကရေစီနဲ့ ပတ်သက်ရင် အလျှော့ပေးဖို့ အဲသည့် ပညာရှင် တချို့ဟာ သူတို့နေထိုင်တဲ့ အနောက်နိုင်ငံများအတွင်းမှာ မပြောရဲပါဘူး။
ကိုယ်လိုအပ်တာကို နိုင်ငံသားတွေအနေနဲ့ တောင်းဆိုခွင့် ရှိပါတယ်။ အစိုးရဆိုတာမျိုးက နိုင်ငံသားတွေဆီက ဖိအား မလာ မချင်း ဇိမ်နဲ့နေလေ့ ရှိပါတယ်။ မြန်မာပြည်မှာ အခုမီးမလာတာနဲ့ ပတ်သက်ပြီး လူတွေဖယောင်းတိုင်ထွန်း လမ်းပေါ်တက် ပြီး သူတို့ရဲ့ဆန္ဒကို ငြိမ်းငြိမ်းချမ်းချမ်း ထုတ်ဖော်တာဟာ လုပ်သင့်တဲ့ အလုပ်လို့ ဆိုပါရစေ။ ဒါကို နောက်ကွယ်က လူတချို့ က စေ့ဆော်လို့ ဖြစ်ရတာလို့ မစွပ်စွဲဘဲ လိုအပ်ချက်ရှိနေလို့ ဒီလိုဖြစ်ရတာလို့ မြင်သင့်ပါတယ်။ မြန်မာနိုင်ငံဟာ စီးပွားရေး ကောင်းကို မကောင်းသေးပါ။ နိုင်ငံသားအများစု မွဲငတ်နေဆဲပါ။ ဒီကြားထဲ ဒီမိုကရေစီ ဆိုတာကလည်း အခုမှ စလုံးရေစ မလို့ ပြောနေဆဲ အခြေအနေမှာဘဲ ရှိပါသေးတယ်။ ဒီလို အချိန်မျိုး ကာလမျိုး အခြေအနေမျိုးမှာ ကိုယ့်တိုင်းပြည်က နိုင်ငံသားပြည်သူတွေ သူတို့လိုအပ်ချက်ကို သူတို့ ထုတ်ဖော်ပြသတာ ဘာမှ အပြစ်မရှိပါလို့ ပြောပါရစေ။ အခုတော့ တချို့ နယ်တွေမှာ ဖယောင်းတိုင်တပ်သားတွေထဲက တချို့ အဖမ်းအဆီး ခံရတယ် စစ်မေးခံရတယ် ဆိုတာလည်း ကြားရပါတယ်။ ဗုံးထောင်တဲ့ ကိစ္စမှမဟုတ်တာ ဘာကို အစိုးရကကြောက်နေတာလဲ။
ဒီကြားထဲ ပြည်ပအခြေစိုက် ရေဒီယိုသတင်းဌာန တချို့ကလည်း ဒီမိုကရေစီနဲ့ လျှပ်စစ်မီး ဘယ်ဟာက ပိုအရေးကြီးသလဲ ဘယ်ဟာက လူတွေအတွက် ပိုလိုအပ်သလဲဆိုတဲ့ ဒီဘိတ်ဆွေးနွေးတာမျိုး လုပ်လာပါတယ်။ ကောင်းတဲ့ ရည်ရွယ်ချက်နဲ့ လုပ်တာမျိုးဖြစ်နိုင်သလို၊ အဲသည့်နှစ်ခုထဲက ဘယ်သင်းက အရေးကြီးဆုံးလဲ ရွေးချယ်ပါဆိုတဲ့ လမ်းကြောင်းကို ဖောက်ပေး တဲ့ သဘောမျိုး ဆိုရင်တော့ သိပ်မကောင်းလှပါ။ ဆက်ရှင်းပါ့မယ်။
ဒါနဲ့ ပတ်သက်လို့ စီးပွားရေးပညာရှင် တဦးဖြစ်တဲ့ ပါမောက္ခ အမာတရာစန်ရဲ့ ဆွေးနွေးငြင်းခုန်ချက် တချို့ကို ပြန်ပြီးတင်ပြ လိုပါတယ်။ စီးပွားရေးလိုအပ်ချက်နဲ့ နိုင်ငံရေးလိုအပ်ချက် (ဒီမိုကရေစီလိုအပ်ချက်) နှစ်ခုအကြားမှာ နယ်ပယ်ရဲ့ သဘောကို လိုက်ပြီး မတူကွဲပြား ခြားနားတာတွေ ရှိပါတယ်တဲ့။ အဲသလို မတူကွဲပြားတာကြောင့် စီးပွားရေးဖွံ့ဖြိုးမှုကသာ အရင်ဆုံး လာသင့်တယ် ဒီမိုကရေစီက နောက်မှလာလည်း ရတယ်ဆိုတဲ့ အငြင်းပွားမှုတွေ ရှိလာပါတယ်။ အဲသည်မှာ အငြင်းပွားမှုရဲ့ ရင်းမြစ်က ဘာလဲဆိုတေ့ စီးပွားရေးတိုးတက်တာက အရင်ဆုံး အဓိကကြလား၊ ဒီမိုကရေစီကလိုအပ်ချက်က အဓိက ကျလား ဆိုပြီး တခုစီကို သီးခြားခွဲထုတ် လိုက်တာကိုက ပြဿနာကို မီးမွှေးပေးလိုက်သလို ဖြစ်သွားပါတယ်။ ဒီနေရာမှာ ဆွေးနွေးသင့် တာက ဒီနှစ်ခုဟာ ဘယ်လိုအပြန်အလှန် မှီတည်နေသလဲ ဆက်စပ်နေသလဲ ဆိုတာကို အရင်ကြိုးစားဖို့ လိုပါတယ်။
စီးပွားရေးဖွံ့ဖြိုးခြင်းနဲ့ ဒီမိုကရေစီကို တခုစီ ခွဲထုတ်ပြီး ဒီဘိတ်လုပ်ငြင်းခိုင်းတာကိုက ပြဿနာလို့ ထောက်ပြလိုပါတယ်။ အစကထဲက နှစ်ခုစလုံးကို မင်းတို့လိုခြင်လို့ မရဖူး။ နှစ်ခုထဲက တခုကိုသာ ရွေးပါဆိုတဲ့ ကန့်သတ်ပေးလိုက်မှုကသာ ပြဿနာလို့ ဆိုနိုင်ပါတယ်။ ဆင်းရဲနေရာကနေ စီးပွားရေးတိုးတက်လာဖို့ ဆောင်ရွက်မယ်ဆိုတာက စီးပွားရေးအရ လိုအပ်ချက်တခုပါ။ အဲတာကို အကောင်အထည်ဖော်ဖို့ ဘာတွေလိုလာပါသလဲ။ ပွင့်လင်းတဲ့ လူထုဆွေးနွေးပွဲတွေ၊ တောင်းဆိုပွဲတွေ၊ ဆန္ဒဖော်ထုတ်ပွဲတွေ၊ လွတ်လပ်တဲ့ မီဒီယာရေးသား တင်ပြချက်တွေ မရှိမဖြစ်လိုလာပါတယ်။ ဆိုလိုတာကတော့ စီးပွားရေးတိုးတက်လာဖို့ ထောင့်ပေါင်းစုံကနေ နိုင်ငံသား ပြည်သူတွေရဲ့ ပူးပေါင်းဆောင်ရွက်မှု လိုတယ်လို့ ဆိုလိုတာ ဖြစ်ပါတယ်။ ဘာဖြစ်လို့ နိုင်ငံသားတွေရဲ့ ပူးပေါင်းဆောင်ရွက် လိုအပ်ပါသလဲ။ အစိုးရတခုထဲ တရပ်ထဲကနေ တိုင်းပြည်စီးပွားရေး တိုးတက်ဖို့ အုံဖွဆိုပြီး ဆေးကြိမ်လုံးနဲ့ တို့သလို ချက်ခြင်းစီးပွားရေးကောင်းအောင် ဆောင်ရွက်လို့ မရတဲ့အတွက်ဖြစ်ပါတယ်။ တိုင်းသူပြည်သား နိုင်ငံသားတွေရဲ့ စီးပွားရေးလိုအပ်ချက်ကို ဖြည့်ဆည်းမယ် ဆိုတဲ့ တချိန်ထဲမှာ နိုင်ငံရေးလိုအပ်ချက်ကလည်း တပြိုင်ထဲ ကပ်ပါ နေလို့ဖြစ်ပါတယ်။ (သို့သော် ဒီလိုချဉ်းကပ်ဆောင် ရွက်တဲ့ ပုံစံမျိုးကို တရုတ်တို့၊ စင်္ကာပူတို့၊ ဗီယက်နမ်တို့က သိပ်ပြီးတော့ လက်မခံပါ။ စကားချပ်) အဲသည့် နိုင်ငံတွေမှာ တော့ စီးပွားရေးက အရင်ကောင်းဖို့လိုတယ် နိုင်ငံရေးဒီမိုကရေစီ အရေးက စီးပွားရေးရဲ့ လက်အောက်ခံသာ ဖြစ်တယ်လို့ သတ်မှတ်ထားလို့ပါ။
နိုင်ငံသားအများစု ဆင်းရဲနေတဲ့ နိုင်ငံတွေမှာ အုပ်ချုပ်သူတွေဟာ ဒီလိုစဉ်းစားလေ့ရှိပါတယ်။ စင်္ကာပူ ဝန်ကြီးချုပ်ဟောင်း လီကွမ်ယူက ဆင်းရဲသားတွေဆိုတာ ဒီမိုကရေစီနဲ့ လွတ်လပ်ခြင်းဆိုတာထက် ထမင်းဝဝစားရရေးကိုသာ ဂရုစိုက်တယ်လို့ ဆိုခဲ့ပါတယ်။ ဒီနေရာမှာ ပါမောက္ခ အမာတရာစန်က ဆင်းရဲသားတွေ ဒီမိုကရေစီနဲ့ လွတ်လပ်ခြင်းကို ဂရုစိုက်မစိုက် သိလိုတယ်ဆိုရင် စမ်းသပ်မှုတခု ပြုလုပ်လို့ ရတယ်လို့ ထောက်ပြပါတယ်။ ဘယ်လိုစမ်းသပ်မှုလဲဆိုတော့ အမှန်တကယ် လွတ်လပ်ပြီး တရားမျှတတဲ့ ရွေးကောက်ပွဲ ကျင်းပပေးဖို့နဲ့ လွတ်လပ်တဲ့ အတိုက်ခံတွေ ပေါ်ပေါက်လာစေခြင်းဆိုတဲ့ နည်းနဲ့ စမ်းသပ်နိုင်တယ်လို့ ဆိုပါတယ်။ အတုအယောင် လွတ်လပ်တာမျိုးကို မဆိုလိုပါ။ သို့သော်လည်း ဒီလိုစမ်းသပ်မယ်ဆိုတော့ အာဏာရှင်စနစ်နဲ့ ကောင်းစားနေတဲ့သူတွေက လက်ခံမှာမဟုတ်ဖူး တနည်းနည်းသုံးပြီး ဆန့်ကျင်လိမ့်မယ် ဆိုတာကို လည်း ပြောထားပါတယ်။ လွတ်လပ်မှုကလည်းမရှိ ဒီမိုကရေစီကလည်း အမည်ခံသာ ဖြစ်နေတဲ့ အခြေအနေအောက်မှာ ကျင်းပပြုလုပ်တဲ့ ရွေးကောက်ပွဲဆိုတာ ညစ်နည်းအဖုံဖုံ အကောက်ကြံတာ အမျိုးမျိုး ရှိနေလို့ပါ။ ဒါနဲ့ ပတ်သက်လို့ မြန်မာ ပြည်ရဲ့ ၂ဝ၁ဝ ရွေးကောက်ပွဲကို ကျနော်တို့ မြင်နိုင်ပါတယ်။ သို့ကလို ကြောင့်မို့ ဆင်းရဲတဲ့ မြန်မာအပါအဝင် တခြားသော မဖွံ့ဖြိုးမတိုးတက်သေးတဲ့ နိုင်ငံတွေမှာ ဒီမိုကရစီနဲ့ နိုင်ငံရေးလွတ်လပ်ခွင့်ဟာ ပုံစံဖျက်ထားခြင်း ခံရလေ့ ရှိနေပါတယ်။
ပြန်ကောက်ရရင် လျှပ်စစ်မီးလာဖို့ အရင်လိုသလား ဒီမိုကရေစီက အရင်လိုအပ်သလားလို့ မေးလာတဲ့ မေးခွန်းဟာ ဆွေးနွေးခြင်းမျိုးဟာ အစကထဲက အဓိပ္ပါယ် မရှိပါဖူး။ ခေါင်ကနေ ချုပ်ထားပြီးမှမေးတဲ့ တဖက်ပိတ် မေးခွန်းလို ဖြစ်နေပါတယ်။ မီးမှန်မှန် ရချင်ရင် ဒီမိုကရေစီ အသာထားဦးလို့ ဆိုတဲ့ အယူအဆဟာ အာဏာကနေ ဆင်းပေးရမှာ စိုးရိမ်တဲ့ အုပ်ချုပ်သူ လူတန်းစား တွေရဲ့ အကြိုက်ကိုသာ ဖော်ကြူးထားတဲ့ ဇာတ်လမ်းမျှသာ ဖြစ်ပါတယ်။ သုဝဏ္ဏသာမ ဇာတ်တော်အတိုင်း ပြောရမယ်ဆိုရင်တော့ နိုင်ငံသားတွေအတွက် သားရွှေအိုးထမ်းလာတာ မြင်ခြင်ပါတယ်ဆိုတဲ့ အဖြေဟာ ကျနော်တို့ တိုင်းပြည် အတွက် လူ့အဖွဲ့အစည်းအတွက် ပိုပြီးမကောင်းပါသလော။
ဇော်မင်း
၂၅ ရက်၊ မေလ၊ ၂ဝ၁၂ ခုနှစ်
Friday, May 25, 2012
Sunday, May 13, 2012
ဒီမိုကရေစီနဲ့ လွတ်လပ်တဲ့ သတင်းမီဒီယာ
ဒီ မိုကရေစီနိုင်ငံတော် တခုရဲ့ အခြေခံအုတ်မြစ်ဟာ လွတ်လပ်တဲ့သတင်းမီဒီယာ တည်ရှိတဲ့ အပေါ်မှာ ရာခိုင်နှုန်း အတော် များများ အခြေပြုတယ်လို့ ဆိုပါတယ်။ ဒီအဆိုကို တင်ပြသူကတော့ World Editors Forum ကမ္ဘာ့ အယ်ဒီတာများအဖွဲ့က ဥက္ကဋ္ဌဖြစ်သူ အဲရစ်ဘီရေးဂျား ဖြစ်ပါတယ်။ သတင်းမီဒီယာ မလွတ်လပ်သမျှ နိုင်ငံတခု အတွင်း ဒီမိုကရေစီအုတ်မြစ်ဟာ ခိုင်ခံ့ဖို့ ခက်ခဲကြောင်း သူကထောက်ပြထားပါတယ်။ ဒါနဲ့ ပတ်သက်လို့ မက္ကဆီကို နိုင်ငံမှာ လက်ရှိဖြစ်နေတဲ့ ကိစ္စရပ်တချို့ကို တင်ပြလိုပါတယ်။ မက္ကဆီကိုနိုင်ငံမှာ ဒီမိုကရေစီ နည်းကျ ရွေးကောက်ပွဲတွေ ရှိပါတယ်။ သမ္မတဟာ ပြည်သူတွေရဲ့ မဲနဲ့သာ သမ္မတ ဖြစ်ခွင့်ရှိပါတယ်။ ဒီမိုကရေစီနည်းကျ ရွေးကောက်ပွဲတွေ ရှိတယ်ဆိုပေမယ့် မက္ကဆီကိုနိုင်ငံဟာ မူးယစ်ဆေးဝါး ရောင်းဝယ်မှုဖောက်ကားမှု ကနေတဆင့် ပေါ်ပေါက်လာတဲ့ အကြမ်းဖက်မှုတွေ များပြားလွန်းတာကြောင့် လုံခြုံမှုကင်းမဲ့တဲ့ နိုင်ငံတနိုင်ငံလို့ ဆိုနိုင်ပါတယ်။ မနှစ်တုန်းကဆိုရင် မူးယစ်ဆေးဝါးနဲ့ ပတ်သက်လို့ ရောင်းဝယ်တဲ့ ကိစ္စများကနေ အကြမ်းဖက်လူသတ်မှုတွေ ဖြစ်ခဲ့တာမှာ လူပေါင်း နှစ်သောင်းကျော် လမ်းပေါ်မှာ ပစ်သစ်ခံခဲ့ရပါတယ်။ အဲဒီလို အကြမ်းဖက်မှု တွေကြောင့် သေဆုံးရသူတွေထဲမှာ သာမန် ပြည်သူတွေအပြင် သတင်းစာနယ်ဇင်း သမားများလည်း ပါဝင်နေတာကို တွေ့ရပါတယ်။ မက္ကဆီကိုမှာ သတင်းမီဒီယာသမားတွေ ဘာကြောင့် အကြမ်းဖက်ခံရတာလဲ ဆိုတာကို ကြည့်လိုက်တဲ့အခါမှာ သူတို့ဟာ မူးယစ်ဆေးဝါးနဲ့ ပတ်သက်တဲ့ သတင်းတွေ၊ မူးယစ်ဆေးဝါးနဲ့ ပတ်သက်လို့ အစိုးရအာဏာပိုင်တွေနဲ့ ဂိုဏ်းတွေအကြား လာဘ်ပေးလာဘ်ယူ ကိစ္စတွေကို အများပြည်သူတွေ သိအောင် ဖော်ထုတ်တင်ပြ ရေးသားတာကြောင့် အငြိုးနဲ့ အသတ် ခံရတယ်လို့ ဆိုနိုင်ပါတယ်။ မက္ကဆီကို သတင်းသမားတွေ အနေနဲ့ အကြမ်းဖက်တိုက်ခိုက်ခံရခြင်း အသတ်ခံရခြင်းတွေ ရှိနေပေမယ့် မက္ကဆီကို သတင်းမီဒီယာ သမားများကတော့ ဆက်ပြီး ရဲရဲဝင့်ဝင့်နဲ့ သူတို့ပြည်သူတွေကို အမှန်အတိုင်း တင်ပြနေဆဲပါ။ ပြီးခဲ့တဲ့ နှစ်တနှစ်ထဲမှာဘဲ မက္ကဆီကို နိုင်ငံမှာ သတင်းသမား ၆၄ ဦးသတ်ဖြတ်ခံခဲ့ရပါတယ်။ ဒီလို သတင်း သမားတွေ အသတ်ခံခဲ့ရခြင်းရဲ့ လက်သယ်များကတော့ အာဏာကို အလွဲသုံးစား ပြုလုပ်နေတဲ့ အစိုးရအရာရှိတွေနဲ့ မာဖီးယား လူဆိုးဂိုဏ်းတွေပဲ ဖြစ်ပါတယ်။ တခါ အာဖရိကတိုက်က အီရစ်ထရီးယားလို့ ခေါ်တဲ့ နိုင်ငံမှာလည်း သတင်းသမားများကို အစိုးရအာဏာပိုင်တွေက လက်လွတ်စပါယ် ဖမ်းဆီး နှိပ်စက် သတ်ဖြတ်နေတယ်လို့ သိရပါတယ်။ အီရစ်ထရီးယား နိုင်ငံဟာ အီသီယိုပီးယား နိုင်ငံနဲ့ ကပ်လျှက်တည်ရှိပါတယ်။ လွန်ခဲ့တဲ့နှစ်က လွတ်လပ်သောရွှေကလောင်ရှင်ဆုကို ရရှိခဲ့တဲ့ သတင်းသမား ဒါဝတ်အိုက်ဇက် ဟာ အီရစ်ထရီးယား နိုင်ငံသား ဖြစ်သလို ဆွီဒင်နိုင်ငံသားလည်း ဖြစ်ပါတယ်။ သူဟာ အီရစ်ထရီးယားနိုင်ငံရဲ့ ပထမဆုံးလို့ ဆိုရမယ့် လွတ်လပ်တဲ့ သတင်းစာကို တည်ထောင်ခဲ့သူများထဲက တဦးလည်း ဖြစ်ပါတယ်။ ဒါဝတ်အိုက်ဇက်ဟာ အီရစ် ထရီးယား အာဏာပိုင်များရဲ့ ဖမ်းဆီးခြင်းခံရပြီး ထောင်ထဲမှာ ထိန်းသိမ်းခံခဲ့ရပါတယ်။ နောက်ဆုံးမှာတော့ ဒါဝတ် အိုက်ဇက် ဟာ ထောင်အတွင်းကနေ ပျောက်ခြင်းမလှ ပျောက်ဆုံးသွားခဲ့ပါတယ်။ အများသူငါရဲ့ ထင်မြင်ယူဆ ချက်ကတော့ အာဏာပိုင်တွေက သူ့ကို သတ်ဖြတ်ပြီး အလောင်းကို ဖျောက်ဖျက်ပစ်လိုက်တယ်လို့ ခန့်မှန်းကြပါတယ်။ တရုတ်နိုင်ငံမှာတော့ လူမှုကွန်ယက် မီဒီယာလုပ်ငန်းတွေ ကြီးမားကျယ်ပြန့်လာတာနဲ့အမျှ အစိုးရရဲ့ ဆင်ဆာဖြတ်တောက်မှု နဲ့ ဝက်ဘ်ဆိုက်များကို ကန့်သတ်ပိတ်ပင်ခြင်းဟာ တဖြည်းဖြည်းနဲ့ များလာနေပါတယ်။ ပါကစ္စတန် နိုင်ငံမှာလည်း သတင်း သမားများဟာ ခြိမ်းခြောက်ခံရခြင်း၊ အကြမ်းဖက် တိုက်ခိုက်ခံရခြင်းတွေနဲ့ ရင်ဆိုင်နေရပါတယ်။ ဒီလိုဖြစ်ရပ်တွေကို သတင်းသမားတွေ ဘာကြောင့် ရင်ဆိုင်နေရတာလဲ။ အာဏာပိုင်တွေက သူတို့ရဲ့ မှားယွင်းမှု၊ ဖောက်ပြန်မှု၊ အလွဲသုံးစား လုပ်မှုတွေကို ပြည်သူတွေအကြား မပြန့်နှံ့စေခြင်တာကြောင့် သတင်းသမားများကို ခြိမ်းခြောက်ခြင်း၊ အကြမ်းဖက်ခြင်းနဲ့ နောက်ဆုံး သတ်ဖြတ်တဲ့အထိ ပြုမူလာကြတာ ဖြစ်ပါတယ်။ ဒီမိုကရေစီ သက်တန်းနုနယ်သေးတဲ့ တိုင်းပြည်တွေဖြစ်တဲ့ အရှေ့ဥရောပ နိုင်ငံတချို့နဲ့ အာဖရိကတိုက်က နိုင်ငံအချို့မှာ သတင်းသမားများနဲ့ ထုတ်ဝေသူတွေကိုယ်တိုင် သတင်းစာတွေ၊ စာစောင်တွေ၊ မဂ္ဂဇင်းတွေကို ပုံမနှိပ်ခင်မှာ ကိုယ့်ဟာကို ပြန်ပြီးဆင်ဆာ လုပ်ကြရပါတယ်။ ဘာကြောင့် ဒီလိုလုပ်ရသလဲဆိုတော့ အစိုးရအာဏာပိုင်တွေနဲ့ ပတ်သက်နေတဲ့ စီးပွားရေးလုပ်ငန်းတွေ အကျိုးစီးပွားတွေကို ပြောင်ကျကျ ဝေဖန်ရေးသားလို့ မရတဲ့အတွက် ကိုယ့်ဟာကို ကြိုပြီး အန္တရာယ်ကို ရှောင်ရသလိုမျိုး လုပ်ရတဲ့အတွက် ဖြစ်ပါတယ်။ ကျနော်တို့ မြန်မာနိုင်ငံမှာကော သတင်းမီဒီယာလောကဟာ ဘယ်လောက် လွတ်လပ်လာပြီလဲဆိုတာ စူးစမ်းဖို့ လိုလာ ပါတယ်။ မြန်မာပြည်မှာလည်း အခုအထိ စာစောင်တွေ ဂျာနယ်တွေဟာ ကိုယ့်ဟာကို ဆင်ဆာလုပ်နေရသေးတဲ့ အခြေအနေကို ဖြတ်သန်းနေရဆဲပါ။ အစိုးရက သတင်းမီဒီယာနဲ့ ပတ်သက်ပြီး ဥပဒေတရပ် ထုတ်ပြန်ဖို့ ကြိုးပမ်း နေပါတယ်။ သတင်းမီဒီယာအတွက် ဥပဒေသတ်သတ် ထုတ်ဖို့လိုမလိုဆိုတာ ဝိုင်းဝန်းစဉ်းစားကြဖို့ လိုအပ်တယ်လို့ ပြောလိုပါတယ်။ မြန်မာနိုင်ငံမှာ အင်္ဂလိပ်ခေတ်ကစလို့ လက်ရှိတည်ရှိနေဆဲ ဥပဒေများဟာ အတော်လေး လုံလောက်နေ တာမို့ မီဒီယာဥပဒေ ဆိုတာမျိုးကို သီးခြားထပ်မံ ပြဌာန်းဖို့ မလိုအပ်ဖူးလို့ ကျွမ်းကျင်သူများနဲ့ ရှေ့မီနောက်မီ ဝါရင့် စာနယ်ဇင်းသမားများက ဆိုထားပါတယ်။ မီဒီယာက အမှားတင်ပြမိရင် ကျူးလွန်မိရင်၊ သူတပါးကို နစ်နာအောင် ဖော်ပြမိရင် တည်ဆဲဥပဒေတွေနဲ့ တရားစွဲနိုင်ပါတယ်။ မီဒီယာဥပဒေဆိုတာ သတ်သတ်မလိုပါဖူးလို့ ထပ်ပြောပါရစေ။ မကြာသေးခင် ဒီလ မေလဆန်းတုန်းက ရန်ကုန်မြို့မှာ ပြန်ကြားရေးဝန်ကြီးဌာနနဲ့ ယူနက်စ်ကိုတို့ ပူးပေါင်းပြီး သတင်းမီဒီယာနဲ့ ပတ်သက်တဲ့ အစည်းအဝေးကြီးတခု ကျင်းပခဲ့ပါတယ်။ အခြေအနေသစ်အတွင်းက စိန်ခေါ်မှုအသစ်များလို့ ခေါင်းစဉ်ပေးထားတဲ့ အစည်းအဝေးကြီး ဖြစ်ပါတယ်။ ပြန်ကြားရေး ဒုတိယဝန်ကြီးက သတင်းသမားတွေ အနေနဲ့ လွတ်လပ်စွာ မတူကွဲပြားတဲ့ အမြင်တွေကို တင်ပြခွင့် ရှိရမယ်လို့ ပြောကြားပါတယ်။ အဲသလို ပြောတော့ ဝမ်းသာရတော့လားပေါ့လေ။ သို့သော်လည်း မိန့်ခွန်းရဲ့ အပိတ်မှာတော့ ရေးတာတော့ရေး ဒါပေမယ့် တိုင်းပြည်စည်းလုံး ညီညွှတ်ရေးနဲ့ အမျိုးသား အကျိုးစီးပွားကိုတော့ မထိခိုက်စေရဖူးလို့ ဆိုပြန်ပါတယ်။ သတင်းမီဒီယာ လွတ်လပ်မှုကို ဖွင့်ပေးသယောင်ယောင်နဲ့ ပြန်ကန့်သတ်ထားတဲ့ သဘောမျိုး သက်ရောက်နေတာ မြင်ရပါတယ်။ အရင်အစိုးရလက်ထက်က ပြောပြောနေတဲ့ တိုင်းရင်းသား စည်းလုံးညီညွှတ်ရေး မပြိုကွဲရေးဆိုတဲ့ ဆောင်ပုဒ်ကို မျက်စေ့ထဲ ပြန်တောင်မြင်လာမိတယ်။ ပြိုကွဲအောင် လုပ်တဲ့သူ အရေးယူမယ်ဆိုတဲ့ သဘောပါပဲ။ Freedom of expression လွတ်လပ်စွာအမြင်တွေကို ဖော်ထုတ်ခွင့်ဆိုတဲ့ အယူအဆဟာ ရာစုနှစ်ပေါင်းများစွာ ကထဲက အသိအမှတ်ပြုလာခဲ့ကြတာ ဖြစ်ပါတယ်။ လွတ်လပ်စွာအမြင်တွေကို ဖော်ထုတ်ခွင့်ဆိုတာ လွတ်လပ်စွာ ဝေဖန်ခွင့် ဆိုတဲ့ သဘောနဲ့ အတူတူပါပဲ။ လွတ်လပ်စွာ ဝေဖန်ခွင့်ကို တင်ပြခဲ့လို့၊ ဝေဖန်ခွင့်ကို အယူအဆကို မြှင့်တင်ခဲ့လို့ ဂရိ အတွေးအခေါ် ပညာရှင်တဦးဖြစ်တဲ့ ဆိုကရေးတီးကို အာဏာပိုင်တွေက ၃၉၉ ဘီစီမှာ အဆိပ်သောက်ပြီး ကိုယ့်ဟာကို စီရင်ဖို့ ဖိအားပေးခဲ့ဖူးပါတယ်။ ဒါဟာ လွန်ခဲ့တဲ့ နှစ်ပေါင်း ၂၄ဝဝ နီးပါးက ဖြစ်ခဲ့တဲ့ အဖြစ်အပျက် တခုပါ။ ဆိုကရေးတီးရဲ့ ခွဲခြမ်းစိတ်ဖြာ အမြင်နဲ့ ဝေဖန်မှုတွေဟာ အေသင်မြို့တော်က လူငယ်တွေရဲ့ စိတ်ဓာတ်တွေကို ပျက်ပြားစေတယ်လို့ အာဏာပိုင်တွေက စွပ်စွဲ ခဲ့တာလည်း ဖြစ်ပါတယ်။ ၁၉ ရာစုတုန်းက မန္တလေးနေပြည်တော်မှာ ရတနာပုံသတင်းစာ တည်ထောင်တော့မယ် ဆိုတော့ မင်းတုန်းမင်းကြီးက သတင်းစာသမားတွေကို လွတ်လပ်ခွင့်ပေးပါတယ်။ ငါမကောင်းရင် ငါ့ကိုရေး၊ ငါ့မိဖုရား မကောင်းရင် မိဖုရားကိုရေး၊ မင်းသား မင်းသမီးတွေ မကောင်းတာလုပ်ရင်လည်းရေး၊ နန်းတော်ထဲကို တံခါးမရှိ ဓားမရှိဝင်စေ ထွက်စေဆိုပြီး မိန့်ကြားခဲ့ ဖူးပါတယ်။ ဆိုလိုတာကတော့ သက်ဦးဆံပိုင် ပဒေသရာဇ် ဘုရင်တပါး လက်ထက်မှာတောင် ဆင်ဆာဖြတ်တာတောက် တာ မရှိခဲ့ဖူးဆိုတာ ထောက်ပြလိုရင်း ဖြစ်ပါတယ်။ အခုနေပြည်တော်က အစိုးရက ဒီမိုကရေစီထွန်းကားအောင် ဆောင်ရွက်မယ်လို့ ပြောထားပါတယ်။ တဆက်ထဲမှာလဲ သတင်းမီဒီယာ လွတ်လပ်ခွင့်ပေးဖို့ ကိစ္စကို ဘာကြောင့် နှောင့်နှေး နေရတာလဲ။ ဒီမိုကရေစီ၊ ဒီမိုကရေစီလို့ ပြောနေတဲ့ ၂၁ ရာစုခေတ် မြန်မာအစိုးရဟာ ၁၉ ရာစုက မြန်မာ ပဒေသရာဇ်ဘုရင် တပါးလောက်တောင်မှ လွတ်လပ်တဲ့ သတင်းမီဒီယာကို လက်ကမ်းကြိုဆိုဖို့ အခုအထိတောင် အဆင်သင့် မဖြစ်သေးဖူးလားလို့ မေးလိုပါတယ်။ ရဲရင့်သော မြန်နိုင်ငံသား သတင်းမီယာသမားများ ပိုမိုများပြား ပေါ်ပေါက်လာပါစေဗျာ။ ဇော်မင်း ၁၃ ရက်၊ မေလ၊ ၂ဝ၁၂ ခုနှစ်
Friday, April 27, 2012
စစ်ဗိုလ်တွေ ပညာရှိဖြစ်လိုသလား
သ
တင်းထဲမှာ တွေ့လိုက် ဖတ်လိုက်ရသည်။ အနာဂတ် မြန်မာနိုင်ငံပညာရေးမှာ နိုင်ငံရေးသိပ္ပံဘာသာရပ်ကို ထပ်တိုး သင်ကြားတော့မည်တဲ့။ အဲတာကို အမျိုးသားလွှတ်တော် တတိယအကြိမ် ပုံမှန်အစည်းအဝေး နဝမမြောက်နေ့မှာ အတည်ပြု လိုက်သည်လို့ သိရသည်။ သည်အဆိုကို တင်သွင်းသူကတော့ ဧရာဝတီတိုင်းက အမတ်တဦးဖြစ်တဲ့ ဦးဉာဏ်လင်းက တင်ခဲ့တာပါတဲ့။
မြန်မာတွေ ခွေးဇာတ်ခင်းကြဖို့ နောက်တကြော့ လုပ်ပြန်ပြီလို့သာ ပက်ပက်စက်စက် ပြောလိုသည်။ နိုင်ငံရေးသိပ္ပံဆိုတာ တက္ကသိုလ် အဆင့်မှာကော အထက်တန်း အလယ်တန်းအဆင့်မှာကော သင်စရာမလိုဟု အပြတ်ပြောလိုက်မည်။ ချွင်းချက် တခုပဲ ရှိသည်။ နိုင်ငံရေးသိပံ္ပသင်လိုသူများ လေ့လာသင်ကြားရန် နိုင်ငံတကာအဆင့်မီ ဌာနတခုတော့ ရှိသင့် သည်။ သည့်ထက် မပိုပါ။ သူတို့ ဘာခြေလှမ်းလှမ်းနေတာလဲ ဆိုတာ ရိပ်မိသည်။ ကျောင်းသားတွေကို ဦးနှောက်ဆေးဖို့ ကြိုးစားတာဟု ဝေဖန်လိုသည်။ ဆိုရှယ်လစ်ခေတ်တုန်းကလည်း နိုင်ငံရေးသိပ္ပံဘာသာရပ်ကို တက္ကသိုလ် အဆင့်မှာ မသင် မနေရ သင်ရမည်ဟု ပြဌာန်းခဲ့ဖူးသည်။ အောင်မြင်မှု မရှိခဲ့ပါ။ နိုင်ငံရေးသိပ္ပံ သင်ကြားသည့် ဆရာ၊ ဆရာမများကို ကျောင်းသားများက ကလောင်း (လူပြက်) အဖြစ် လောက်သာ သဘောထားခဲ့ကြသည်။ အဲသည့် ဆရာ ဆရာမများကို ကျောင်းသားများက အစိုးရလူ အစိုးရဖက်သား အဖြစ်သာ မြင်၍ဖြစ်သည်။ သူတို့ကား သနားဖွယ်ရာ နယ်ရုပ်များသာ။
ပညာရေးကို အစိုးရက ဘာဖြစ်လို့ ဝင်ဝင်စွက်ဖက်နေသနည်း။ ဦးနေဝင်း အုပ်ချုပ်ခဲ့သော ၂၆ နှစ်တာကာလမှာ ပညာရေး ကို သူတို့ အမျိုးမျိုးစမ်းသပ်ခဲ့ကြသည်။ သို့သော် အောင်မြင်မှုဆိုတာ တခုမှ မရခဲ့ပါ။ အဲသလို မအောင်မြင်ရတဲ့အထဲ နိုင်ငံရေး သိပ္ပံဘာသာကို တက္ကသိုလ်အဆင့်မှာ မသင်မနေရ ပြဌာန်းခဲ့သည်။ အဲသည့်အချိန်က သူတို့သင်ကြားသည့် နိုင်ငံရေးသိပ္ပံ ဘာသာရပ်သည် ဆိုရှယ်လစ်စနစ်သာ ကောင်းသည်၊ ဆိုရှယ်လစ်စနစ်သာ လူအဖွဲ့အစည်းကို တိုးတက် အောင်လုပ်နိုင်သည် ဟူသော ချဉ်းကပ်မှုဖြင့် သင်ကြားခဲ့ခြင်းဖြစ်သည်။ ဒီမိုကရေစီ ထွန်းကားသည့် တိုင်းပြည်တွေမှာရှိတဲ့ တက္ကသိုလ်များက သင်ကြားသည့် နိုင်ငံရေးသိပ္ပံ ဘာသာရပ်သည် မတူကွဲပြားသည့် တခြားသော စနစ်၊ အတွေးအခေါ်၊ အယူအဆ၊ အမြင်ဒသန တို့ကို သင်ယူလေ့လာခွင့် ရှိသည်။ အရှေ့တိုင်း အနောက်တိုင်း အတွေးအခေါ်များ၊ စစ်ပွဲတွေ ဖြစ်ပွားခြင်း၊ စက်မှု ထွန်းကားခြင်းနဲ့ ကောင်းကျိုးဆိုးကျိုးတွေ၊ ကုန်စည်ကူးသန်း ရောင်းဝယ်ခြင်းမှတဆင့် ပေါ်ပေါက် လာသော နိုင်ငံများ၏ နိုင်ငံရေးအားသာမှု အားနည်းမှု စသည်တို့ကို လေ့လာခြင်း၊ စစ်အေးတိုက်ပွဲကြီးရဲ့ အကျိုးဆက် အစရှိတာတွေ အပါအဝင် နောက်ထပ်ကိစ္စရပ် အမြောက်အများကိုလည်း နိုင်ငံရေးသိပ္ပံ ဘာသာရပ်မှာ သင်ယူနိုင်သေး သည်။ ဆိုရှယ်လစ် တမျိုးထဲ ကောင်းသည်ဟု သင်ကြားတာမျိုးမဟုတ်။ အခုသူတို့ သင်ကြားပေးမည့် နိုင်ငံရေးသိပ္ပံ ဘာသာရပ်သည် မြန်မာ့နည်း မြန်မာ့ဟန် စည်းကမ်းပြည့်ဝသော ဒီမိုကရေစီသာ မြန်မာတို့အတွက် အကျိုးပေးမည် ဆိုသည့် ချဉ်းကပ်မှုမျိုးသာ ဖြစ်လိမ့်မည်ဟု ကြိုတင်ဟောကိန်း ထုတ်လိုက်မည်။
နောက်တချက် ပြောလိုတာက နိုင်ငံရေးသိပ္ပံ ဘာသာရပ်ကို ဒီမိုကရေစီ တိုင်းပြည်တွေမှာ တက္ကသိုလ်ကျောင်းသားတိုင်း သင်ယူဖို့ မလိုအပ်ပါ။ မိမိသက်ဆိုင်ရာ ဘာသာရပ်အလိုက်သာ လိုအပ်ပါက သင်ယူကြခြင်းဖြစ်သည်။ မသင်မနေရ ဆိုတာမျိုး မရှိ။ ဥပမာ ပြောရပါက ညူကလီးယားဖစ်ဆစ် ဘာသာရပ်ကို အထူးပြု လေ့လာနေသည့် ကျောင်းသားသည် နိုင်ငံရေးသိပ္ပံကို ဘာသာရပ် တခုအနေဖြင့် သင်ယူဖို့ မလိုခြင်း ဖြစ်သည်။ ထို့အတူ ခေတ်သစ်အနုပညာ ဘာသာရပ်ကို သင်ယူနေသော ကျောင်းသားတဦးသည်လည်း နိုင်ငံရေးသိပ္ပံကို နောက်ထပ် ဘာသာရပ်တခုအနေဖြင့် သင်ကြားစရာ မလိုပေ။ ထို့အတူ အလယ်တန်းအဆင့် အထက်တန်းအဆင့် ကျောင်းသားများလည်း နိုင်ငံရေးသိပ္ပံကို မသင်မနေရဟု ဇွတ်အတင်း သင်ယူခိုင်းခြင်းမျိုးလည်း မရှိပါ။
မြန်မာပြည်ရဲ့ ပညာရေးလောကမှာ အခုအထိ အကြီးမားဆုံး ပြဿနာကို မရှင်းဘဲ သည်အတိုင်းထားခဲ့သည်မှာ နှစ်ပေါင်း ၅ဝ လောက်ရှိခဲ့ပြီ။ အကြီးမားဆုံး ပြဿနာ ဆိုသည်ကတော့ လူမှုဗေဒ (သို့မဟုတ်) လူမှုသိပ္ပံ ဆိုသည့် Social science ဘာသာရပ်ကို အမြစ်ကပါမကျန် သတ်ဖြတ်သုတ်သင် ခဲ့ခြင်းပင် ဖြစ်သည်။ သူများနိုင်ငံတွေမှာ လူမှုဗေဒ ဘာသာရပ်ကို ကျောင်းသားတွေအတွက် မူလတန်း အရွယ်ကထဲက နည်းနည်းခြင်း သင်ကြားပို့ချသည်။ လူမှုဗေဒ ဘာသာရပ်ကို သင်ကြား ပေးနေသည်ဟု ကျောင်းသားကလေးများ သိစရာတောင် မလိုခဲ့ပါ။ ဘာတွေကိုများ ဘယ်လို သင်ကြားပေး နေသနည်း။ သဘာဝ ပတ်ဝန်းကျင်နဲ့ အကောင်ပလောင်လေးတွေကို ချစ်မြတ်နိုးတတ်ဖို့၊ အမှိုက်ကို စနစ်တကျ စွန့်ပစ်ဖို့၊ ပလပ်စတစ် ပစ္စည်းများရဲ့ ဆိုးကျိုးများ၊ ရေအရင်းအမြစ်ကို တန်ဖိုးထားဖို့၊ လူတဦးနဲ့တဦး ချစ်ချစ်ခင်ခင်ရှိကြဖို့၊ အကြမ်းဖက်မှုကို ရှောင်ရှားဖို့၊ Fairness လို့ခေါ်တဲ့ မျှတမှုကို နားလည်တတ်စေခြင်း၊ ဥပဒေကို မချိုးဖောက်ဖို့ သင်ကြား ပေးခြင်း၊ ဒီမိုကရေစီကို နားလည်လာစေဖို့ ဒီမိုကရေစီဆိုတဲ့ စကားလုံးကို တိုက်ရိုက်မသုံးဘဲ သင်ကြားပေးခြင်း စတာတွေ ဖြစ်သည်။ တချို့နိုင်ငံများမှ ပညာရေးစနစ်တွင် သမိုင်း၊ ပထဝီ၊ သိပ္ပံ စသည့် ဘာသာရပ်များကို ထိုခေါင်းစဉ်များအတိုင်း နာမည်တပ်၍ မသင်ကြားဘဲ Humanity (လူသားနှင့်လူ့ပတ်ဝန်းကျင်) ဆိုသည့် ခေါင်းစဉ်အောက်တွင် စုပေါင်း၍ မူလတန်း အလယ်တန်း အဆင့်တွေအတွက် သင်ကြားပေးသည်။ ထပ်ထည့်မယ်ဆိုပါက နောက်ထပ်လည်း ခေါင်းစဉ်တွေ အများကြီးရှိသေးသည်။ ထားလိုက်တော့။
ကျနော်တို့ မြန်မာနိုင်ငံမှာ အထက်က ပြောခဲ့တာတွေကို ကျောင်းသားတွေအတွက် မူလတန်းကထဲက သင်ကြားပေးတာ မျိုး ရှိခဲ့ပါသလား။ လုံးဝမရှိခဲ့တာ ရာစုနှစ်တဝက် ကျော်ခဲ့ပါပြီ။ အခုလည်း လူမှုဗေဒဆိုင်ရာ ကိစ္စများကို မူလတန်းမှ တက္ကသိုလ် အဆင့်အထိ သင်ကြားပေးနေခြင်းလည်း မရှိသေးပါ။ ဒါမျိုးတွေ ဘာမှမရှိဘဲနဲ့ နိုင်ငံရေးသိပ္ပံကို ဘာသာရပ် တခုသဖွယ် မကြာခင်မှာ ပြဌာန်း၍ သင်ကြားတော့မည်တဲ့။ အလှမ်းကျယ် အလယ်လပ် ဖြစ်တတ်တယ် ဆိုတာကို မမေ့သင့်။
နောက်တချက်ကတော့ ပညာရေးစနစ် ဘယ်လိုရှိသင့်တယ်၊ ဘာတွေကို ဘယ်လိုပြဌာန်းသင့်တယ် ဆိုတာ သက်ဆိုင်ရာ ပညာရှင်များရဲ့ အလုပ်သာဖြစ်သည်။ ပညာရှင်အများစုက လွှတ်တော်အမတ် မဟုတ်သလို လွှတ်တော်အမတ် အများစု ကလည်း ပညာရှင်မဟုတ်ပေ။ ဆိုရှယ်လစ်ခေတ်တုန်းက ပြည်သူ့လွှတ်တော် ကိုယ်စားလှယ်များနဲ့ အာဏာပိုင်တွေကို နှစ်ယောက်ပေါင်းလို့မှ လေးတန်းမအောင်ဟု ပျက်လုံးထုတ်ခဲ့ဖူးသည်။ အခုခေတ် အမတ်တွေကိုတော့ အဲသလောက် မနှိမ်လိုပါ။ သို့သော်လည်း မေးရမှာက အမတ်မင်းတို့ ကျောင်းကောင်းကောင်းနေ ပညာကောင်းကောင်း သင်ခဲ့ဖူးသလား ဆိုတာတော့ မေးလိုသေးသည်။ အစိုးရနဲ့ အမတ်မင်းများရဲ့ အလုပ်က ပညာရေးနဲ့ ပတ်သက်လို့ ပညာရှင်တွေ တင်ပြလာ တာကို ကောင်းကောင်းမွန်မွန် နားထောင် လေ့လာဖို့သာဖြစ်သည်။ သမ္မတ အကြံပေးဆိုတာတွေကော အိပ်ပျော်နေ သလားဟု မေးလိုသည်။ သည်အတိုင်းဆိုရင် သမ္မတအကြံပေးထဲမှာကော ပညာရှင် အတုအယောင်တွေ မပါနိုင်ပြီလော။ ပါတယ်ဆိုရင် သမ္မတတယောက်တော့ဖြင့် အလိမ်ခံထိနေပြီလို့ ဆိုရပေမည်။
စစ်ဗိုလ်တွေ ပညာမတတ်ပါဟု ပြောလျှင် ရိုင်းသည်ဟု မအောက်မေ့ပါနဲ့။ စစ်ဗိုလ်ဖြစ်ဖို့ ဗိုလ်သင်တန်းတက်ရာက ဗိုလ်ဖြစ် တယ်ဆိုရုံနဲ့ မလုံလောက်၊ ခေတ်ပညာပါတတ်သည်ဟု တံဆိပ်ကပ်လိုသောကြောင့် ဒီအက်စ်အေ ဆိုတာကြီး ပေါ်လာရ သည် မဟုတ်လော။ ဗိုလ်လည်းဖြစ် ဘွဲ့လည်းရဟု လုပ်လိုသည်ကိုး။ တကယ်တန်း ပြောရပါက အဖြစ် လုပ်ပေးလိုက်သော ဘွဲ့ရစစ်ဗိုလ်သာ ဖြစ်သည်။ ပညာတကယ် မတတ်ခဲ့ပါ။ ရှေးဟောင်း အဆိုတခုရှိသည်။ ပညာမဲ့သူသည် ကိုယ့်ကိုယ်ကို ပညာရှိဟု ထင်နေပါက လူမိုက်သာဖြစ်သည်လို့ ကြားဖူးသည်။ သို့သော်လည်း ပညာမဲ့သူသည် ကိုယ့်ကိုယ်ကို ပညာမဲ့ ကြောင်းသိ၍ ပညာရှိများကို ဆည်းကပ်ပါက ထိုသူကို ပညာရှိဟုပင် သတ်မှတ်နိုင်သည်တဲ့။
မြန်မာပြည်ရဲ့ ပညာရေးကို နိုင်ငံတကာနဲ့အမီ လိုက်လိုတယ်ဆိုရင်၊ အမှန်တကယ် ဖွံ့ဖြိုးတိုးတက်စေလိုရင် သက်ဆိုင်ရာ ပညာရှင်များကို ဆည်းကပ်ပါ။ ပညာရှင်များကို လွတ်လွတ်လပ်လပ် လုပ်ပိုင်ခွင့်ပေးပါလို့ ပြောလိုပါကြောင်း။
ဇော်မင်း
၂၇ ရက်၊ ဧပြီလ၊ ၂ဝ၁၂ ခုနှစ်
Wednesday, April 18, 2012
ငြိမ်းချမ်းရေးဆိုတိုင်းလည်း
ငြိမ်းချမ်းရေး တည်ဆောက်ဖို့ဆိုပြီး ပြောလာရင် အသိဉာဏ်မြင့်မားတဲ့ လူသားအားလုံး အနေနဲ့ ဘယ်သူမှ မငြင်းပါဘူး။ ဒါကြောင့်မို့ အကြမ်းဖက်နေတာ လူသတ်နေတာ နှိပ်စက်နေတာတွေကို ဘယ်လိုအသွင်ယူ ပုံဖျက်ထားပါစေ ဘယ်သူမှ လက်မခံပါဘူး။ ဒါပေမယ့် ငြိမ်းချမ်းရေး တည်ဆောက်ဖို့ ဦးဆောင်ပြီး အလုပ်လုပ်တယ်ဆိုတာ လူတိုင်းလုပ်နိုင်တဲ့ အလုပ် မျိုး မဟုတ်ဘူး ဆိုတာလည်း သဘောပေါက်ကြဖို့ လိုပါတယ်။
ဗြိတိသျှလူမျိုး ဖွံ့ဖြိုးတိုးတက်ရေးဆရာ တဦးဖြစ်တဲ့ ပါမောက္ခ ဒေးဗစ်ကီင်း David Keen က အခုလို ထောက်ပြထားတာ ရှိပါ တယ်။ What kind of peace we are talking about? Peace for who? Whose term of peace?
ဒါကို အနီးစပ်ဆုံး ပြန်ပြောရမယ်ဆိုရင်၊ ဘယ်လို ငြိမ်းချမ်းရေးမျိုးကို ကျနော်တို့ ပြောနေတာလဲ။ ဘယ်သူ့အတွက် ငြိမ်းချမ်း ရေးလဲ။ ဘယ်သူ့ အလိုကျ တည်ဆောက်မယ့် ငြိမ်းချမ်းရေးလဲ ဆိုတာကို အရင်ဆုံး သရုပ်ခွဲနိုင်ဖို့တော့ လိုပါတယ်။ လက်ဝဲဖက်က လိုချင်တဲ့ပုံစံမျိုးနဲ့ ငြိမ်းချမ်းရေးလား။ လက်ယာဘက်က လိုချင်တဲ့ပုံစံ ငြိမ်းချမ်းရေးလား။ အာဏာရှင်ဖက်က လိုချင်နေတဲ့ ငြိမ်းချမ်းရေးပုံစံလား။ စီးပွားရေးကော်ပိုရေးရှင်းကြီးတွေ စီးပွားရေးကုမ္ပဏီတွေ လိုချင်နေတဲ့ ငြိမ်းချမ်းရေး ပုံစံလား။ ဒါမှမဟုတ် တသီးပုဂ္ဂလ လူတဦးစ နှစ်ဦးစ ကာလတိုတခုအတွင်း နာမည်ကောင်းရဖို့ ကျော်ကြားဖို့ လုပ်တဲ့ ငြိမ်းချမ်းရေး တည်ဆောက်မှုမျိုးလား။ ငြိမ်းချမ်းရေး တည်ဆောက်တာကို အကြောင်းပြပြီး အချိန်ဆွဲချင်တာ မျိုးလား။ ငြိမ်းချမ်းရေးလုပ်ငန်းကို ဗန်းတင်ပြီး ပရောဂျက်ငွေ လိုချင်လို့လား။ လားပေါင်းများစွာ ရှိနေပါတယ်။ အကယ်၍ ကျနော် တို့ဟာ ငြိမ်းချမ်းရေးတည်ဆောက် မယ် အဲသည့်လုပ်ငန်းစဉ်မှာ ပါဝင်မယ်လို့ ခံယူတယ်ဆိုပါက ဒါတွေကို ကြိုတင်နားလည် ဖို့ လိုအပ်ပါတယ်။ ပွင့်ပွင့်လင်းလင်း ပြောရရင် မြန်မာတပြည်လုံးအတွက် ငြိမ်းချမ်းရေး လုပ်ငန်းစဉ်မှာ ခေါင်းဆောင်ဖို့ ဦးရွက်ဖို့ ဆိုတာ ကိုယ်နဲ့ တန်၏ မတန်၏ အရင်ဆုံး နားလည်ဖို့ ပြောတာပါ။
ကျနော်တို့ နိုင်ငံဟာ လွတ်လပ်ရေးနဲ့အတူ ပြည်တွင်းစစ်ဖြစ်ခဲ့ပါတယ်။ အခုလည်း နေရာအတော်များများမှာ တိုက်ပွဲတွေ ဖြစ်နေဆဲပါ။ တိုက်ပွဲ မဖြစ်တဲ့ နေရာတွေမှာလည်း လယ်သိမ်းယာသိမ်း၊ နှိပ်စက်နေတာတွေ အများကြီး ရှိနေပါသေးတယ်။ ပြည်တွင်းငြိမ်းချမ်းရေးအတွက် အကြိမ်ကြိမ်ကြိုးပမ်းခဲ့လို့ မြန်မာပြည်မှာ အသိအမှတ်ပြုခဲ့ရတဲ့ လူပုဂ္ဂိုလ်တွေ ရှိခဲ့ပါတယ်။ ဥပမာအားဖြင့် မြင်သာအောင် ပြောရရင် ဆရာကြီး သခင်ကိုယ်တော်မှိုင်း၊ ဆရာကြီး ဒဂုန်တာရာ၊ ဆရာကြီး ရွှေဥဒေါင်း အစရှိတဲ့ လူပုဂ္ဂိုလ်တွေ ဖြစ်ပါတယ်။ တခြားသော လူပုဂ္ဂိုလ်များလည်း ရှိပါသေးတယ်။ သူတို့တတွေဟာ ငြိမ်းချမ်းရေး လုပ်ငန်းစဉ်တွေမှာ မပါဝင်ခင်ကထဲက သူတို့မှာပိုင်ဆိုင်ထားတဲ့ အလုပ်၊ ပညာ၊ သမိုင်းအစဉ်အလာ၊ သမာဓိနဲ့ ရိုးသားတဲ့ နိုင်ငံရေး ရပ်တည်ချက်တွေကြောင့်၊ ပါရမီတွေကြောင့် ဒီလို လုပ်ငန်းစဉ်တွေထဲမှာ အများရဲ့ တောင်းဆိုမှုကြောင့် ပါလာတာလို့ ပြောပါရစေ။ ဘယ်သူကမှ မေတ္တာရပ်ခံခြင်းမရှိ၊ တာဝန်ပေးခြင်း မရှိဘဲ ကိုယ့်ဟာကိုယ် ငြိမ်းချမ်းရေး လုပ်ငန်းစဉ်ထဲကို ခုန်ဝင်လာတဲ့ သူတွေ မဟုတ်ပါဖူး။ အခုမြင်နေရတာက တချို့လူတွေဟာ ကိုယ့်ဟာကိုယ် ငြိမ်းချမ်းရေး အကျိုးတော်ဆောင် ခန့်ပြီး ငြိမ်းချမ်းရေးကို တွင်တွင်ပြောနေတာ မြင်နေရပါတယ်။ အမြင်ဆိုးလှပါတယ်။
သီရိလင်္ကာနိုင်ငံမှာ အစိုးရနဲ့ တမီလ်တိုက်ဂါး သူပုန်တွေအကြားမှာ ငြိမ်းချမ်းရေးတည်ဆောက်ဖို့ နိုင်ငံတကာက တတ်ကျွမ်းသူ အတော်များများပါ ဝင်ရောက်ဆောက်ရွက်ပေးခဲ့ပါတယ်။ နော်ဝေနိုင်ငံဆိုရင် ဦးဆောင်တဲ့ နေရာကနေ နှစ်ပေါင်းများစွာ အလုပ် လုပ်ခဲ့ပါတယ်။ သီရိလင်္ကာအစိုးရကလည်း ငြိမ်းချမ်းရေး လိုချင်တယ်ဆိုတဲ့ ပုံစံနဲ့ အဲသည့် လုပ်ငန်းတွေကို လက်ခံခဲ့ပါတယ်။ ဒါပေမယ့် လက်တွေ့မှာ အချိန်ဆွဲဗျူဟာလို အသုံးချခြင်းပါ။ နောက်ဆုံးတော့ တမီလ်တိုက်ဂါး သူပုန်တွေကို စစ်ရေးနည်းနဲ့ အပြုတ်တိုက်ပစ်ခဲ့တာ အားလုံးသိကြပါတယ်။ သီရိလင်္ကာကိစ္စမှာ နော်ဝေအစိုးရနဲ့ နော်ဝေငြိမ်းချမ်းရေး အကျိုးဆောင်တွေရဲ့ လုံးပမ်းမှုတွေ မအောင်မြင်ခဲ့ပါ။ သည့်မတိုင်ခင် အတော် စောစောပိုင်း နှစ်များကလည်း အာရပ် အစ္စရေး ငြိမ်းချမ်းရေး အတွက် နော်ဝေပညာရှင်တွေ ကြိုးပမ်းခဲ့ဖူးပါတယ်။ သို့သော် နေရာများစွာမှာ ခုခံနေတဲ့ လောဘမျိုးစုံကြောင့် မအောင်မြင်ခဲ့ပါ။ အခုလည်း မီးရထား ဝန်ကြီး ဦးအောင်မင်း နော်ဝေမှာ ငြိမ်းချမ်းရေး လုပ်ငန်းစဉ်အတွက် အကူအညီတွေ နည်းနာတွေ တောင်းခံဖို့ ရောက်နေတယ်လို့ သိရပါတယ်။ အာရပ် အစ္စရေးနဲ့ သီရိလင်္ကာတုံးက ကိစ္စတွေ မအောင်မြင်ခဲ့လို့ အခုမြန်မာကိစ္စမှာလည်း အောင်မြင်မှာ မဟုတ်ပါဘူးလို့ အပြစ် တင် မစောလိုပါ။ သို့သော် စောင့်ကြည့်ဖို့တော့ လိုပါလိမ့်မယ်။
ဒီလို ကာလမျိုး အချိန်မျိုးမှာ အင်္ဂလန်က ဦးဇင်း ဦးဥတ္တရက ဦးဆောင်ပြီး လန်ဒန်မှာ သင်္ကြန်ပွဲလုပ်ရင်း သမ္မတ ဦးသိန်းစိန် ကို ငြိမ်းချမ်းရေးဆုပေးတယ်လို့ ကြားရပါတယ်။ အဲသည့်ပွဲကို မြန်မာသံအမတ်လည်း တက်ရောက်တယ်လို့ သိရပါတယ်။ မြန်မာသံအမတ် တက်ရောက်တာ ပြဿနာလို့ ကျနော်က မမြင်ပါ။ အင်္ဂလန်ရောက် မြန်မာအသိုင်းအဝိုင်း နဲ့ မြန်မာသံရုံးတို့ ဆက်ဆံရေး ပြန်လည် ပွင့်လင်းလာတဲ့ ကိစ္စလို့ လတ်တလောအားဖြင့် မြင်ပါတယ်။ သို့သော်လည်း ဦးဇင်း ဦးဥတ္တရက ဘယ်သူ့ကို ကိုယ်စားပြုပြီး အဆိုပါ ငြိမ်းချမ်းရေးဆုကို ဦးသိန်းစိန်ကို ပေးအပ်တာလဲဆိုတာက စိတ်ဝင်စားစရာပါ။ ဦးဇင်း အဆိုအရ မြန်မာအသိုင်းအဝိုင်းနဲ့ တိုင်ပင်ပြီးမှ ဒီကိစ္စကို လုပ်တာပါလို့ ဆိုပါတယ်။
သို့သော်လည်း လန်ဒန်အခြေစိုက် မြန်မာအသိုင်းအဝိုင်း အတွင်းက တက်ကြွလှုပ်ရှားသူ အများစုရဲ့ အဆိုအရ ဒီလို ငြိမ်းချမ်းရေးဆု ပေးဖို့ကိစ္စကို ဦးဇင်းအနေဖြင့် သူတို့ကို တိုင်ပင်ခြင်းမရှိဟု ကြားသိရပါတယ်။ ဒီအချက်ဟာ မှန်နေတယ် ဆိုရင် ဦးသိန်းစိန်ကို ငြိမ်းချမ်းရေးဆု ပေးတာဟာ ဦးဇင်းတဦးထဲ သဘောဆန္ဒနဲ့ လုပ်တာမျိုး ဖြစ်နေတယ်လို့ ထောက်ပြ လိုပါတယ်။ ဗုဒ္ဓဘာသာ ဘုန်းတော်ကြီးတွေကို ရွှေဝါရောင် တော်လှန်ရေးတုန်းက စစ်ဗိုလ်ချုပ်တွေ သတ်တာ၊ ဖမ်းတာ၊ နှိပ်စက်တာ၊ ထောင်ချခဲ့တာ လေးနှစ်နဲ့ ခွန်နှစ်လပဲ ရှိပါသေးတယ်။ အဲသည့် ဗိုလ်ချုပ်တွေဟာ အခုအစိုးရသစ်မှာလည်း ပြန်ပါနေတာ ဦးဇင်းသတိမထား မိလေသလား။ အဲသည့် လန်ဒန် သင်္ကြန်ပွဲကို တက်ရောက်လာတဲ့ မြန်မာသံအမတ်ကို ဦးသိန်းစိန်အတွက် ငြိမ်းချမ်းရေးဆု ပေးမယ့်အစား ဦးဇင်းအနေနဲ့ အကျဉ်းကျနေတဲ့ သံဃာတော်များ အပါအဝင် အခြား သော နိုင်ငံရေး အကျဉ်းသားတွေ လွှတ်ပေးဖို့ ပရိတ်သတ်ရှေ့မှာ ငြိမ်းချမ်းစွာ တောင်းဆိုခဲ့တယ်ဆိုရင် ပိုပြီးလှ ပိုပြီး ကောင်းမယ်လို့ ထောက်ပြလိုပါတယ်။ ဗြိတိသျှ နိုင်ငံကူးလတ်မှတ် ကိုင်ထားတဲ့ ဦးဇင်းအနေနဲ့ မြန်မာပြည် ပြန်လည်ပတ်ဖို့ သံရုံးကနေ ဗီဇာလိုတာကြောင့် သမ္မတ ဦးသိန်းစိန်ကို ငြိမ်းချမ်းရေးဆု ပေးတယ်လို့တော့ ကျနော့်တဦးထဲ အနေဖြင့် မထင်ပါ။ စေတနာ အမှားနဲ့ တပ်ဦးကျွံတယ်လို့သာ မြင်မိပါတယ်။
နော်ဝေနိုင်ငံက နိုဗယ်ငြိမ်းချမ်းရေးကော်မတီဟာ တချိန်တုန်း ပါလက်စတိုင်း ပျောက်ကြားခေါင်းဆောင် ယာဆာ အာရာဖတ်နဲ့ အစ္စရေးခေါင်းဆောင် ယစ်ဇတ်ရာဘင် တို့ကိုပူးတွဲပြီး နိုဗယ်ငြိမ်းချမ်းရေးဆု ပေးအပ်ခဲ့ပါတယ်။ နောက်မကြာခင်မှာပဲ ယစ်ဇတ်ရာဘင်ဟာ အစွန်းရောက် အစ္စရေးလူငယ်တဦးရဲ့ လက်ချက်နဲ့ သေဆုံးခဲ့ရပါတယ်။ အာရပ်နဲ့ အစ္စရေးလည်း အခုအထိ တဖက်နဲ့တဖက် သတ်ဖြတ်နေဆဲပါ။ ငြိမ်းချမ်းရေး တည်ဆောက်တယ် အကောင် အထည်ဖော်တယ် ဆိုတာ စကားလုံးလှသလောက် ထင်ထားသလို မလွယ်ဘူးဆိုတာ တင်ပြလိုရင်းဖြစ်ပါတယ်။ သီရိလင်္ကာမှာ တမီလ်တိုက်ဂါး သူပုန်တဖွဲ့ထဲ ရှိခဲ့တာပါ။ ဒါကို အစိုးရကလည်း အင်အား အလွန်အကျွံသုံးပြီး ချေမှုန်း နိုင်ခဲ့ပါတယ်။ နောက်ထပ် အဖွဲ့တွေ မရှိပါ။ မြန်မာပြည်မှာက လက်နက်ကိုင် ဘယ်နှစ်ဖွဲ့ ရှိသလဲဆိုတာ ရေတွက်ရင် လက်ဆယ်ချောင်းထက် ပိုနေပါသေးတယ်။ သံသယတွေကို မဖြေဖျောက် နိုင်သမျှ၊ တဦးနဲ့တဦး ယုံကြည်မှု လေးစားမှုတွေ မရှိသမျှ အဖွဲ့တိုင်းဟာ သူတို့ပိုင်ထားတဲ့ ကိုင်ထားတဲ့ လက်နက်ကို စွန့်လွှတ်မှာ မဟုတ်ဖူးဆိုတာ သိဖို့လိုပါတယ်။ ဒါဟာ သာမန်လောဘထက် ပိုတဲ့ အခြေအနေပါ။
လူသားတို့အတွက် ရေရှည်တည်တံ့ခိုင်မြဲမယ့် ငြိမ်းချမ်းရေးတည်ဆောက်မှု လုပ်ငန်းမျိုးကလွဲလို့ ရလိုမှုလောဘ တခုခုအပေါ်မှာ အခြေခံထားပြီး တခြားသောပုံစံ တခုခုနဲ့ တည်ဆောက်လိုတဲ့ ငြိမ်းချမ်းရေးဟာ အောင်မြင်မှာ မဟုတ်ပါကြောင်း။
ဇော်မင်း
၁၈ ရက်၊ ဧပြီလ၊ ၂ဝ၁၂ ခုနှစ်
Friday, April 6, 2012
အလှည့်အပြောင်းကို နားလည်နိုင်ပါစေ
တရုတ်ဖက်က ခိုးပြီး မြစ်ဆုံဆည်တည်ဆောက်ရေးကို ဆက်လုပ်နေတယ်လို့ သတင်းတွေ ထွက်လာပါတယ်။ တရုတ် လူမျိုး ကျွမ်းကျင်သူ ၅ဝဝ လောက်ကိုလည်း ဆည်တည်ဆောက်နေတဲ့ နေရာမှာ သွားရောက် အလုပ်လုပ်ကိုင်ဖို့လည်း အာဏာပိုင်တွေ ကို တောင်းဆိုနေတယ် ဆိုတာလည်း ကြားရပါတယ်။
ဘယ်လိုဖြစ်နေကြတာလဲ ဗျာတို့။ သမတဦးသိန်းစိန် ကိုယ်တိုင်က မြစ်ဆုံဆည်တည်ဆောက်ရေး လုပ်ငန်းကို ဒီအစိုးရ သက်တန်း အတွင်းမှာ ရပ်ဆိုင်းထားမယ်လို့ လူသိရှင်ကြားရော ကမ္ဘာသိပါ အမိန့်ထုတ်ထားပြီးသားပဲ မဟုတ်လား။ ဒီအမိန့်ကို ဘယ်သူတွေက လွန်ဆန်ဖို့ ကြိုးစားနေတာလဲ။ သမတ အမိန့်ကိုတောင် လွန်ဆန်ဖို့ လုပ်လာတယ်ဆိုတော့ မဟုတ်မှ လွဲရော နောက်ကွယ်ကနေ ရလာမယ့် အကျိုးအမြတ်က သက်ဆိုင်သူတွေအတွက် အတော်ကို ကြီးမားလို့ ဖြစ်ရမယ် ဆိုတာကတော့ မှန်းလို့ ရနေပါတယ်။ ကျနော်တို့ တိုင်းပြည်မှာ သဘာဝ သယံဇာတကို ရောင်းစားပြီး မီလျှံနာ ဖြစ်နေတဲ့ လူတွေကို ရေတွက်ကြည့်မယ်ဆိုရင် အတော်လေး များပါတယ်။ မြန်မာနိုင်ငံကနေ ထုတ်ကုန်တခုခု၊ ကုန်ချော တခုခု ထုတ်လုပ်ပြီး နိုင်ငံခြား ဈေးကွက်မှာ တင်သွင်းရောင်းခြနိုင်လို့ ချမ်းသာတဲ့သူက ဘယ်နှစ်ဦးရှိမလဲ။ ကျနော် သုတေသီတဦး မဟုတ်ပေမယ့် ပြောရဲပါတယ်။ အခုအထိ တယောက်မှ မရှိသေးပါဘူး။
မြစ်ဆုံဆည် တည်ဆောက်ရေးကို ဆက်လုပ်မယ် ဆိုရင်တော့ မကြာခင်အတွင်း မြန်မာနိုင်ငံမှာ အမျိုးသားရေး လက္ခဏာ အသွင်နဲ့ လူထုလှုပ်ရှားမှုတွေ ပေါ်လာလိမ့်မယ်လို့ ဟောစာတမ်း ထုတ်လိုပါတယ်။ လူထုလှုပ်ရှားမှုတွေကနေ ဆက်ပြီး အားကောင်း လာမယ်ဆိုရင် လူထုအုံကြွမှုအထိ ဖြစ်လာပါလိမ့်မယ်။
လူထုအုံကြွလာပြီဆိုရင် နောက်ဆက်တွဲ ဖြစ်လေ့ ဖြစ်ထရှိတာက နိုင်ငံရေးအရ တောင်းဆိုမှုတွေပါ ကပ်ပါလာလေ့ ရှိတယ် ဆိုတာကို လက်ရှိအစိုးရအနေနဲ့ သဘောပေါက်ဖို့ လိုပါတယ်။ လောင်တဲ့မီးဟာ ကိုယ်မွှေးခဲ့တဲ့မီး ဆိုတာကို သတိပြုဖို့ လိုပါတယ်။ ဒါဟာ အတိုက်ခံ နိုင်ငံရေးအုပ်စုတွေ သွေးထိုးလို့ မဟုတ်ပါဖူး။ ဧရာဝတီဆိုတာ ကျနော်တို့ နိုင်ငံရဲ့ ကိုယ်ပိုင်မြစ်ကြီး ဖြစ်ပါတယ်။ ကိုယ့်နိုင်ငံအတွင်းမှာ မြစ်ဖျား ခံပြီး ပင်လယ်ထဲ စီးဝင်ပါတယ်။ သံလွင်တို့ မဲခေါင် မြစ်တို့လို တရုတ်ပြည်ဖက်မှာ မြစ်ဖျားခံလာတဲ့ မြစ်မျိုး မဟုတ်ပါ။ ဧရာဝတီပျက်စီးမှာကို ဘယ်နိုင်ငံသားကမှ လိုလားမှာ မဟုတ်ပါဖူး။ ဘာကြောင့်လဲဆိုတော့ ဧရာဝတီမှာ အမျိုးသား လက္ခဏာရပ်တွေ အမြောက်အများ ပါဝင်နေလို့ပါဘဲ။ လူအဖွဲ့အစည်းတခု ရုန်းကန်လှုပ်ရှားခဲ့တဲ့ သမိုင်းကြောင်း၊ ဖြစ်တည် လာတဲ့ ယဉ်ကျေးမှု ဓလေ့ထုံးစံ၊ မီတင်းနေရတဲ့ စိုက်ပျိုးရေးနဲ့ အတူ တခြားသော အသက်မွေးဝမ်းကြောင်းများ အစရှိတဲ့ ကိစ္စရပ်တွေ အပြင် အခြားသော အကြောင်းအရင်း များလည်း ရှိနေပါသေးတယ်။ အထူးသဖြင့်ကတော့ မြစ်ကြီးကောသွား မှာကို အားလုံးက စိုးရိမ်ကြပါတယ်။ မြစ်ကြီးကောသွားရင် အထက်ကပြောခဲ့တဲ့ လက္ခဏာတွေ ပျောက်ကွယ် သွားတော့မှာ ကိုး။
ရေရှည်မှာ တိုင်းပြည်အတွက် ဆိုးကျိုးကို ဖြစ်ပေါ်စေမယ်ဆိုတာ သိသိကြီးနဲ့ မိခင်နိုင်ငံရဲ့ သဘာဝအရင်းအမြစ် တွေကို လက်လွတ်စပယ် အသုံးပြု၊ ရောင်းစားနေတာတွေကို နိုင်ငံသားတွေ အားလုံးက ဆန့်ကျင်ကြပါလိမ့်မယ်။ နောင်တချိန် မှာလည်း သဘာဝ အရင်းအမြစ်ကြောင့် မတော်မတရား ချမ်းသာလာခဲ့တဲ့ သူတွေကို နိုင်ငံသားတွေက ဒဏ်ခတ်ဖို့ တောင်းဆို လာပါလိမ့်မယ်။ ငါတို့မှာ အာဏာရှိတယ်၊ သင်းတို့ ဘာလုပ်နိုင်မှာလဲ ဆိုတဲ့ အမြင်နဲ့ ချဉ်းကပ်မယ်ဆို ရင်တော့ ဝက်ဝက်ကွဲ၊ ပြဲပြဲလန်အောင် မှားလိမ့်မယ်လို့ ထောက်ပြလိုပါတယ်။ နိုင်ငံရေး ဆိုတာ ကြွေတလက် ကြက်တခုန်ပါ။ နောင်လာမယ့် ဆယ်နှစ် အနှစ်နှစ်ဆယ် အတွင်းမှာ ဖြစ်လာမယ့် အပြောင်းအလဲတွေကို အခုနေအခါမှာ မြင်ကြမှာ မဟုတ်ပါဖူး။ လောဘဇောက ကပ်နေကြတာကိုး။
ဖိလစ်ပိုင်က မားကို့စ်၊ ပီရူးက ဖူဂျီမိုရီ၊ ချီလီက ဗိုလ်ချုပ်ကြီး ပီနိုရှေး သူတို့အားလုံးဟာ သူတို့ လုပ်ခဲ့တာတွေ ပြုမူခဲ့ တာတွေ အတွက် ပြန်ပြီးပေးဆပ်ခဲ့ရပါတယ်။ မားကို့စ်ဆိုရင် ဆွစ်ဇာလန်က ဘဏ်တွေမှာ သူအပ်ထားတဲ့ ငွေတွေကို ဘယ်သူမှ ထိလို့ကိုင်လို့ မရဖူးလို့ ထင်ခဲ့မိတာပါ။ သို့သော်လည်း သူသေပြီး နှစ်အတော်ကြာမှာ ဒေါ်လာသန်းပေါင်း ရာနဲ့ချီရှိတဲ့ အဲသည့် အပ်ထားတဲ့ ငွေတွေကို ဆွစ်ဇာလန်က ဘဏ်တွေက ဖိလစ်ပိုင်ပြည်သူတွေအတွက် ပြန်လည် လွဲအပ်ပေးခဲ့ရ ပါတယ်။ ဖူဂျီမိုရီကတော့ ဂျပန်ကို ထွက်ပြေးခိုလှုံပေမယ့် နောက်ပိုင်းမှာ ဂျပန်ကပြန်အပ်လို့ ပီရူးကို ပြန်အပို့ခံရပြီး သူလုပ်ခဲ့ တာတွေ အတွက် ထောင်နန်းစံပြီး ပေးဆပ်နေရပါတယ်။ ဗိုလ်ချုပ်ကြီး ပီနိုရှေးလည်း အိုကြီးအိုမ အသက်အရွယ်ကျမှ တိုင်းပြည်က ပေးတဲ့ ပစ်ဒဏ်ကို ခံခဲ့ရပါတယ်။
မြန်မာပြည်က အာဏာရှင်တွေနဲ့ သူတို့ရဲ့ စီးပွားဖက်တွေလည်း ဒါတွေကို နမူနာယူ သင်ခန်းစာယူပြီး အသိညဏ်ရှိရှိနဲ့ နေတတ်၊ ထိုင်တတ်၊ လုပ်တတ်ဖို့ လိုနေပါပြီ။ အခုချမ်းသာ ကြွယ်ဝနေတဲ့ ဗိုလ်ချုပ်များ၊ လုပ်ငန်းပေါင်းများစွာကို ပိုင်ဆိုင်ထားတဲ့ သူတို့ရဲ့ သားသမီးများ၊ ထိုသူတွေ အားလုံးနဲ့ပေါင်းပြီး ကြိကြိတက် ချမ်းသာနေတဲ့ ခရိုနီတွေများလည်း တိုင်းပြည်ကောင်းရာ ကောင်းကျိုး အတွက် ဘာတွေပြန်လုပ်ပေးမလဲဆိုတာ စဉ်းစားဖို့လိုနေပါတယ်။ အသက်အရွယ်လွန် နေတဲ့ ဗိုလ်ချုပ်တချို့ အတွက်တော့ သူတို့ရဲ့ သက်တန်းအတွင်းမှာ မားကို့စ်တို့၊ ပီနိုရှေးတို့၊ ဖူဂျီမိုရီတို့လို အဖြစ်မျိုး ရင်ဆိုင်ကောင်းမှ ရင်ဆိုင်နိုင်ရမှာ ဖြစ်ပေမယ့် သူတို့ရဲ့ သားသမီးများနဲ့ ခရိုနီတွေက အများစုဟာ အရွယ်ကောင်းတွေ ဖြစ်ပါတယ်။ နောင်လာမယ့် ဆယ်နှစ် အနှစ်နှစ်ဆယ်မှာ သူတို့ဟာ အရွယ်အားဖြင့် ၆ဝ၊ ၆၅၊ ၇ဝ အရွယ်တွေ ဖြစ်လာ ပါလိမ့်မယ်။ အဲသည့် အချိန်ကြမှ နိုင်ငံရေး အပြောင်းအလဲတွေကြောင့် ဘာဖြစ်လိမ့်မယ် ဆိုတာ ဘယ်သူမှ မသိနိုင်ပါဖူး။ လုံခြုံတယ်လို့ သူတို့ထင်နေတဲ့ သူတို့ရဲ့ ငွေမဲတွေကို အပ်နှံထားတဲ့ နိုင်ငံခြားဘဏ်တွေဟာ (အနောက်နိုင်ငံ၊ အာရှနဲ့ အရှေ့အလယ်ပိုင်းက ဘဏ်တချို့) နောင်နှစ်အတော်အကြာမှာ ကမ္ဘာ့နိုင်ငံရေး အပြောင်းအလဲကြောင့် သူတို့ငွေတွေကို ထုတ်မပေးတော့ဘဲ ထိန်းချုပ်တာမျိုး ဖြစ်လာနိုင်ပါတယ်။ နိုင်ငံရေး အပြောင်းအလဲတွေကလည်းဖြစ် သက်ဆိုင်ရာ တိုင်းပြည်က အစိုးရကလည်း အထောက်အထားနဲ့ တကွ ခိုင်ခိုင်လုံလုံ တောင်းဆိုလာရင် ဘဏ်တွေဟာ အဲသည့်ငွေ တွေကို သက်ဆိုင်ရာ တိုင်းပြည်ကို ပြန်လည်အပ်နှံရပါတယ်။
နိုင်ငံရေးအပြောင်းအလဲတခု ဘယ်လို ဖြစ်ထွန်းပြောင်းလဲလိမ့်မလဲ။ ဘယ်သူမှ တပ်အပ်မသိပါ။ ငါ့ရဲ့ နေပြည်တော်ဟာ ကမ္ဘာကြီးရဲ့ အလယ်ဗဟိုမှာ တည်ရှိတယ်လို့ ထင်နေတဲ့၊ ငါဟာ မင်းတကာက ခန့်ငြားပြီး ဘုန်းကြီးတယ်လို့ ထင်နေတဲ့ မြန်မာဘုရင်တွေ ကမ္ဘာ့ နိုင်ငံရေးအပြောင်းအလဲကြားမှာ ဇတ်သိမ်း မကောင်းခဲ့ပါ။ အင်္ဂလိပ်တွေဟာ မြန်မာအပါ အဝင် ကိုလိုနီတွေကို နောက်ထပ် နှစ်ပေါင်း တရာနှစ်ရာ အုပ်ချုပ်ပြီး အမြတ်ထုတ်ခွင့် ရဦးမယ်လို့ ထင်ခဲ့ပါတယ်။ သို့သော် ဒုတိယ ကမ္ဘာစစ်နဲ့ အတူတူ အဲသည့်ထင်ကြေးဟာ ပြောင်းလဲ့ခဲ့ရပါတယ်။ ဒုတိယကမ္ဘာစစ် ဖြစ်ရခြင်းကလည်း သူတို့လို အရင်းရှင် အချင်းချင်း လောဘဇောတိုက် ပြဿနာပေါ်ရာကနေ စတင်တာပါ။ ကိုလိုနီအုပ်ချုပ်ခံ ဒေသကလူတွေ လှုံ့ဆော်လို့ သူတို့အချင်းချင်းကြား စစ်ဖြစ်ရတာ မဟုတ်ပါ။ တခါ ဦးနေဝင်းလည်း သူ့တသက်မှာ အေးအေးချမ်းချမ်း အုပ်ချုပ်ရပြီ နေရပြီလို့ ထင်ထားတာ အိုကြီးအိုမကြမှ ဇာတ်သိမ်း မကောင်းပါ။ အဲသလိုပါဘဲ တချိန်က တန်ခိုးထက်ခဲ့တဲ့ ဗိုလ်ချုပ်ခင်ညွှန့်လည်း အလားတူ ကြုံခဲ့ရတယ် မဟုတ်ပါလား။ ဗိုလ်ချုပ်မှူးကြီး သန်းရွှေ ဘယ်လိုဘယ်ပုံ သူရဲ့ နောက်ဆုံး နေ့တွေကို ဖြတ်သန်းမလဲ ဆိုတာကလည်း စောင့်ကြည့်ရဦးမှာပါ။
မြန်မာနိုင်ငံက သဘာဝအရင်းအမြစ်တွေကို ရောင်းစားပြီး အလွန်အမင်း ချမ်းသာနေသူတွေ အနေနဲ့ ငါ့အလှည့်တော့ အဲသလို ဖြစ်လိမ့်မယ် မဟုတ်ဖူးလို့ တွက်နေရင် မှားပါလိမ့်မယ်။ အနာဂတ်ဆိုတာ ဘာဖြစ်မယ်ဆိုတာ ဘယ်သူမှ တိတိ ကျကျ မသိပါ။ ဗေဒင်ဆရာနဲ့ အကြားအမြင်ဆရာလည်း မဟောနိုင်ပါ။ အဲတာကြောင့် အချိန်မနှောင်းခင်မှာ တိုင်းပြည် အတွက် နိုင်ငံသားတွေအတွက် ပြန်လည်ပေးဆပ်ဖို့ ပြန်လည်ကျေးဇူးဆပ်ဖို့ နားလည်သင့်တယ်လို့ ထောက်ပြလိုရင်း ဖြစ်ပါတယ်။ အဲသလို နားလည်တယ်ဆိုရင် ထပ်ပြီးပြောလိုတာက တိုင်းပြည်ရဲ့ အရင်းအမြစ်တွေကို ထိမ်းသိမ်းဖို့ လက်လွတ်စပယ် မလုပ်ဖို့ လိုတယ်ဆိုတာကိုလည်း တဆက်ထဲ သဘောပေါက်ဖို့ လိုပါကြောင်း။
ဇော်မင်း
၅ ရက်၊ ဧပြီလ၊ ၂ဝ၁၂ ခုနှစ်
Thursday, March 29, 2012
စိတ်တွေကို အရင်ပြင်ဖို့လိုလိမ့်မည်
ဘန် ကောက်မြို့ လူစည်ကားသည့် တနေရာ၌ ဖြစ်သည်။ အသက် ၆ဝ ဝန်းကျင်ခန့် အမျိုးသမီးကြီးသုံးဦးနှင့် အသက် ၂၅ နှစ်ခန့် အမျိုးသမီးငယ် တဦး ဈေးဝယ်နေကြသည်။ သူတို့လေးဦးစလုံး မြန်မာလူမျိုးတွေ ဖြစ်သည်။ ဘာကြောင့်လဲဆိုတော့ အဖွားကြီး သုံးယောက်နှင့် မိန်းမပျိုတို့ တဦးနှင့်တဦး မြန်မာလို စကားကို အကျယ်ကြီးပြောနေတာကို ကြားရသောကြောင့် ဖြစ်သည်။ ထို အချိန် သူတို့နားသို့ အပြာနုရောင် ရှပ် လက်ရှည်နှင့် ကာကီရောင် ရှိုးဘောင်းဘီကို သားသားနားနား ဝတ်စားထားသည့် အသက်လေးဆယ် အရွယ် ခန့် လူစိမ်းအမျိုးသားတဦး ချဉ်းကပ်လာသည်။
လူစိမ်း။ ။ အဒေါ်တို့က မြန်မာပြည်က လာတာမဟုတ်လား။ ထိုင်းကိုလာတော့ ပတ်စ်ပို့တွေ ဘာတွေ ပါကြရဲ့လား။ အဒေါ်တို့ကို ကြည့်ရတာ နယ်စပ်ကနေ ခိုးဝင်လာတဲ့ ပုံမျိုးတော့ မဟုတ်ပါဖူး။ ဒီမှာ ဘယ်လောက်ကြာကြာ နေကြမှာတုန်း။
မြန်မာစကားဖြင့် မေးလိုက်သော လူစိမ်း၏ အသံကြောင့် အဒေါ်ကြီးသုံးဦးစလုံး အလန့်တကြားဖြင့် ထိုလူကို မော့ကြည့်ရင်း ကျယ်လောင် ကျယ်လောင် စကားပြောနေရာမှ ဟုတ်ခနဲဆိုသလို အသံများတိတ် သွားကြသည်။
ပထမအဒေါ်ကြီး။ ။ အမလေး လန့်လိုက်တာကွယ်။
ဒုတိယအဒေါ်ကြီး။ ။ မင်းက ဘယ်သူတုန်းကွဲ့။
တတိယအဒေါ်ကြီး။ ။ ပတ်စ်ပို့လား၊ ပါပါတယ်ကွယ်၊ ပါပါတယ်။
လူစိမ်း။ ။ ရဲတွေ့လို့ ပတ်စ်ပို့မပါရင် အဖမ်းခံရမှာ စိုးလို့ အဒေါ်တို့ကို စေတနာနဲ့ မေးတာပါ။ အဒေါ်တို့က မြန်မာလို အကျယ် ကြီး ပြောနေတာမို့လား။
မြန်မာလိုအကျယ်ကြီး ပြောနေတာမို့လားဟု ဆိုသော လူစိမ်း၏စကားကြောင့် အဒေါ်ကြီး သုံးဦးစလုံး စိုးရိမ် သွားဟန်ရှိသည်။
ပထမအဒေါ်ကြီး။ ။ မောင်ရင်က ဘယ်သူလဲကွဲ့။ ဒီနိုင်ငံကို လာလည်တာလား။
လူစိမ်း။ ။ ကျနော်က ထိုင်းလူမျိုး ရဲအရာရှိပါ။ ဒါကြောင့် အဒေါ်တို့မှာ ပတ်စ်ပို့ပါရဲ့လားလို့ မေးတာပါ။ ပတ်စ်ပို့များ ပါတယ် ဆိုရင် ကျနော် ကြည့်ပါရစေ။
ဒုတိယအဒေါ်ကြီး။ ။ ဟဲ့ ရဲအရာရှိတဲ့၊ ပတ်စ်ပို့တဲ့။ ထုတ်ပြလိုက်ကြ။
ထိုစဉ် တတိယအဒေါ်ကြီးက သံသယရှိဟန်ဖြင့် “မင်းက ထိုင်းရဲအရာရှိဆိုပြီး ဘာဖြစ်လို့ မြန်မာစကားတတ် နေတာတုန်းကွဲ့” ဟုမေးလိုက်သည်။
လူစိမ်း။ ။ ဒါက ဒီလိုပါ။ ကျနော်က တရားမဝင်ခိုးဝင်လာတဲ့ မြန်မာတွေကို ဖမ်းရပြီး အဲသည့်အမှုတွေချည်းပဲ ဆက်တိုက် ဆိုသလို ကိုင်လာရတာ ကလည်း အနှစ်နှစ်ဆယ် ကျော်ပြီဆိုတော့ သူတို့နဲ့ ဆက်ဆံရင်း မြန်မာစကား တတ်လာတယ် ဆိုပါတော့။
လူစိမ်း၏ အဖြေကို ဟုတ်မှာပါဘဲဟု အဒေါ်ကြီး သုံးဦးစလုံး ယုံကြည်သွားဟန် ရှိသည်။ ပတ်စ်ပို့တွေက ဘယ်သူ့ အိတ်ထဲမှာတုံး၊ ရှာကြစမ်းပါဟု အဒေါ်ကြီးချင်းချင်း ပြောရင်းခေါင်းချင်း ရိုက်၍ရှာနေကြသည်။ တော်တော်နဲ့ ရှာမတွေ့ကြ။
ပထမအဒေါ်ကြီး။ ။ နေပါဦး။ ငါတို့ အိတ်ထဲမှာတော့ မတွေ့ဖူး။ ဘယ်သူ့ အိတ်ထဲမှာများ ပေါင်းထည့်မိ လိုက်ပါလိမ့်။
ဤတွင် ဒုတိယအဒေါ်ကြီးမှ သတိရဟန်ဖြင့် ဈေးဆိုင်မှ ပစ္စည်းများကို သဲသဲမဲမဲရွေးနေသော အမျိုးသမီးငယ်ကိုလှမ်း၍ “ဟဲ့ ဟဲ့ မိသင်းကြည် ညီးအိတ်ထဲမှာ မို့လား၊ ပတ်စ်ပို့တွေ။ ထုတ်ပေးစမ်းအေ။ ဒီမှာ ရဲအရာရှိတဲ့၊ ပတ်စ်ပို့ စစ်နေတယ်။”
မိသင်းကြည်ဆိုသည့် မိန်းမပျိုက သူ၏စလင်းဘက်အိတ်ကြီးကို မွှေနှောက်ရှာရင်း “ဒေါ်လေး ကျမတော့ ရှာ မတွေ့ဘူး။ မဟုတ်မှလွဲရော ဟော်တယ်က အခန်းထဲမှာ ကျန်ရစ်ခဲ့ပြီထင်တယ်။ ပျောက်တာတော့ မပျောက် ပါဘူး” ဟု ပြောလိုက် သည့်နောက် အဒေါ်ကြီး သုံးဦးစလုံး၏ မျက်နှာများ ဆီးရွက်လောက် ဖြစ်သွားသည်။
လူစိမ်း။ ။ ဒါကြောင့် ကျနော်ပြောတယ်မို့လား။ ပတ်စ်ပို့နဲ့ လာတယ်ဆိုရင် ဒီမှာ ဘယ်ကိုသွားသွား ပတ်စ်ပို့ကို အမြဲဆောင် ထားဖို့ လိုတယ်။ မပြနိုင်ရင် အဖမ်းခံရပြီး ထောင်တွေဘာတွေ ကျနိုင်တယ်ခင်ဗျ။
တတိယအဒေါ်ကြီး။ ။ ငါ့တူရယ်၊ အဒေါ်တို့က တကယ်ဘဲ ပတ်စ်ပို့နဲ့ လာတာပါ။ မယုံရင် အဒေါ်တို့ တည်းနေတဲ့ ဟော်တယ်အထိ လိုက်ကြည့်လို့ ရပါတယ်။ (စိုးရိမ်ဟန်ဖြင့်) ဟဲ့ မိသင်းကြည်၊ ဒို့ဟော်တယ် နာမည်က ဘာတဲ့ တုန်း၊ ဘယ်လမ်းမှာ ရှိတာလဲအေ့။ သူ့ကို ပြောလိုက်စမ်းပါဦး။
မိသင်းကြည်ဆိုသည့် တူမဖြစ်ဟန်ရှိသော မိန်းကလေးက စိတ်တိုနေသည့် လေသံဖြင့် “ကျမက ထိုင်းလိုမှ မတတ်တာ ဘယ် လိုပြောရမှာတုန်း ဟော်တယ် လိပ်စာကို” ဟု ပြောလိုက်ရင်း ထိုင်းဘာသာဖြင့် ရေးထားသည့် ဟော်တယ်လိပ်စာ ကတ်ပြားကို အိတ်ထဲမှထုတ်၍ လူစိမ်းထံသို့ ထိုးပေးလိုက်သည်။
လူစိမ်း။ ။ အဒေါ်တို့ရော ဒီကငါ့ညီမရော စိတ်မဆိုးနဲ့နော်။ ကျနော်က ထိုင်းရဲအရာရှိမဟုတ်ပါဖူး။ မြန်မာပါပဲ။ အဒေါ်တို့ကို တမင် စနေတာပါ။
ထိုအခါကြမှ အဒေါ်ကြီးသုံးယောက် ပြန်၍ ကျယ်လောင်ကျယ်လောင် မြန်မာလိုပြောရင်း၊ တဦးက “ငါထင်သား ပဲ ထိုင်းလူမျိုး ရဲအရာရှိက မြန်မာလို အဲသလောက် ပတ်ရည်နှပ်ရည် မပြောနိုင်ပါဖူးလို့”။ နောက်တဦးကလည်း “သိဘူးလေအေ ရဲအရာရှိက ပတ်စ်ပို့ စစ်တယ်ဆိုတော့လည်း” ဟု အချင်းချင်း ပြောရင်း အရှက်ပြေ ရယ်မော နေကြ လေသတည်း။
၂။ ချင်းမိုင်မြို့လည် တနေရာမှ ကုန်တိုက်ကြီးထဲကနေ သမီးငယ်ကို လက်ဆွဲ၍ ကိုဖိုးသော် ပြန်ထွက်လာသည်။ ဇနီးဖြစ်သူက ကွန်ပြူတာတလုံးနှင့် အလုပ်များနေ၍ ဟော်တယ်က အခန်းထဲမှာ ကျန်ရစ်ခဲ့သည်။ ကိုဖိုးသော် နှင့် ခွန်နှစ်နှစ်အရွယ် သမီးငယ် တို့ အပြင်ထွက်၍ ကုန်တိုက်ထဲတွင် နေ့လည်စာ သွားစားခြင်းဖြစ်သည်။ ဇနီး သည် အတွက် ထိုင်းကြက်ဆီထမင်း တထုပ်ဝယ် လာခဲ့သည်။
ဟော်တယ်က ဓာတ်လှေကားရှေ့တွင် အပေါ်ကိုပြန်တက်ရန် စောင့်နေသည်။ ထိုအချိန် ဘောင်းဘီရှည် ဝတ်ထားသော အသက် ၆ဝ ကျော်ခန့် အရွယ်ရှိ အမျိုးသမီးကြီးနှစ်ဦးလည်း ဓာတ်လှေကား လာစောင့်နေကြ ရင်း တရုတ်လိုလို ကိုရီးယားလိုလို စကားတွေပြောနေကြသည်။ ဓာတ်လှေကားပွင့်သွား၍ ဖိုးသော် သမီးငယ်ကို လက်ဆွဲ၍ ဓာတ်လှေကားထဲ ဝင်လိုက်သည်။ အဖွားကြီးနှစ်ဦးလည်း လိုက်ဝင်သည်။ ဖိုးသော်တို့အခန်းက ရှစ်ထပ်မှာ ဖြစ်သည်။ တိုးရစ်ဖြစ်ပုံရသော ထိုအဖွားကြီး နှစ်ဦး၏ အပြန်အလှန် အတင်းစကားများကြောင့် ဖိုးသော်သာမက သမီးငယ်လည်း အတော်လေး အံ့အားသင့် သွားရသည်။
ပထမအဖွားကြီး။ ။ (မြန်မာသံ ပီပီသသကြီးဖြင့် အားရပါးရပြောလိုက်သည်) အမလေးတော်၊ အဖေကြီးက မဲသလောက် သမီးလေးကတော့ ဖြူလိုက်တာ။ သမီးအရင်းမှ ဟုတ်ကဲ့လား မသိဖူး။ သားအဖလို့ပြောရင် ဘယ်သူယုံမှာတုန်း။
ဒုတိယအဖွားကြီး။ ။ (သူလည်း မြန်မာသံပီပီကြီးဖြင့်) ညီးကလည်း၊ ကလေးမလေး အမေက ဖြူလို့ဖြစ်မှာပေါ့။ တရုတ်ထဲမှာတောင် အသားမဲတဲ့ တရုတ်ငချိတ်တွေ တပုံကြီးဟာကိုး။
သမီးငယ်က ဖိုးသော်ကို မော့ကြည်ပြီး ပြုံးပြရင်း ရယ်ခြင်ပက်ကျိ ဖြစ်နေသည်။ ဖိုးသော်က သမီးငယ်ကို ဘာမှ မပြောနဲ့ ဆိုသည့် သဘောဖြင့် ပြန်၍ အံ့ကြိတ်ပြလိုက်သည်။
ပထမအဖွားကြီး။ ။ သူတို့ကြည့်ရတာ ထိုင်းတော့ ဟုတ်ဟန်မတူဖူးအေ့။ မလေးရှားတို့ ဖိလစ်ပိုင်တို့များလား မသိဖူး။ မလေးတို့ ဖိလစ်ပိုင်တို့မှာလည်း အတော်လေး အသားညိုတဲ့ လူမျိုးတွေ ရှိတာကိုး။
ဒုတိယအဖွားကြီး။ ။ အေးဟဲ့ မြန်မာတော့ မဟုတ်နိုင်ဖူး။ မြန်မာဆိုရင်တော့ သိသာပါတယ်။ လူတွေကမွဲပြီး အာဟာရ ချို့တဲ့ နေကြတော့ လူရုပ်တောင် ကောင်းကောင်း ပေါ်တော့တာမှ မဟုတ်တာ။ ပြီးတော့ ဒီလို ဟော်တယ်မျိုးကို ကပ်နိုင်ဖို့ဆိုတာ ဝေးသေး။
“တင်” ဆိုသည့် အသံဖြင့် ဓာတ်လှေကားသည် ရှစ်ထပ်တွင် ရပ်၍ တံခါးပွင့်သွားသည်။ ဖိုးသော် သမီးငယ်ကို လက်ဆွဲ၍ ဓာတ်လှေကားအပြင်သို့ ထွက်လိုက်သည်။ အဖွားကြီး နှစ်ဦးလည်း ထွက်လိုက်လာသည်။ သူတို့ လည်း ရှစ်ထပ်မှာ တည်းနေတာ ဖြစ်နိုင်သည်။
ဖိုးသော် မနေနိုင်တော့ဘဲ “အန်တီတို့လည်း ဒီအထပ်မှာဘဲ တည်းသလား” ဟု ရုတ်ချည်းမေးလိုက်သည်။ အဖွားကြီး နှစ်ယောက်စလုံး၏ မျက်နှာများမှာ ဟင်းခိုးစားရင်း လူမိသော ကလေးများနှယ်။
ပထမအဖွားကြီး။ ။ ငါ့တူရယ် စောစောက ပြောခဲ့တာတွေ ဘယ်လိုမှ မအောက်မေ့ပါနဲ့။ သမီးလေးက ဖြူလွန်း ချောလွန်းလို့ ပြောလိုက်မိတာပါ။ အဲ ငါ့တူကို ရုပ်ဆိုးတယ်လို့ ပြောတာမဟုတ်ဖူးနော်။
ဒုတိယအဖွားကြီး။ ။ မလေးတော်၊ မြန်မာတွေ အချင်းချင်း လာတွေ့နေတာကိုး။ ငါ့တူရယ် စိတ်မဆိုးပါနဲ့။ မြန်မာ တော့ မဟုတ်လောက်ဖူးလို့ ထင်လို့ ပြောမိတာပါကွယ်။
ဖိုးသော်။ ။ အန်တီတို့ ရန်ကုန်က လာတာလား။ ဒီချင်းမိုင်မှာ ဘယ်နှစ်ရက် နေဦးမလဲ။
ပထမအဖွားကြီး။ ။ အန်တီတို့က မြန်မာပြည်က ထွက်လာပြီး အခု ထိုင်ဝမ်မှာ နေနေတာ နှစ်ပေါင်း သုံးဆယ့် ငါးနှစ် ရှိပြီကွဲ့။ ထိုင်းကို လာလည်တာပါ။
ဒုတိယအဖွားကြီး။ ။ မြန်မာပြည်ကို ပြန်လည်ခြင်လွန်းလို့ ဗီဇာလျှောက်တာ ခဏခဏပါပဲကွယ်။ တခါမှ ဗီဇာ မရသေးဖူး ငါ့တူရဲ့။ ဒါနဲ့ အလွမ်းပြေဆိုပြီး အိမ်နီးချင်း ထိုင်းကိုပဲ လာလည်ကြရတာ။
ထို့နောက် ဖိုးသော် သမီးငယ်နှင့် အဖွားကြီးနှစ်ယောက် သက်ဆိုင်ရာ အခန်းများဆီသို့ သွားရင်း လမ်းခွဲလိုက် ကြတော့သည်။
၃။ ရန်ကုန်က လူကြီးတဦး အညာက မြို့လေးတခုမှာ အလည်ရောက်နေသည်။ သူက အဲသည့်မြို့သူနဲ့ အကြောင်းပါ ထားသည်။ ထိုလူကြီး၏ မိဘမျိုးရိုးထဲတွင် အနောက်တိုင်းသွေး ပါထားသည်မို့ ထိုလူကြီး၏ အသားအရေ အရပ်အမောင်းသည် အနောက်တိုင်းပုံစံလို ဖြစ်နေသည်။ အင်္ဂလိပ် ဘာသာစကားကို ကျွမ်းကျင် သည်။ ဒါ့အပြင် ထိုလူကြီးသည် အနောက်တိုင်းသွေး အနည်းငယ်ပါသော်လည်း မြန်မာပြည်ပေါက်မို့ မြန်မာ စကားကို မြန်မာတဦးလို ကျွမ်းကျင်သည်။ ထိုလူကြီးသည် အစအနောက် သန်သည်။ ရယ်စရာ ဇာတ်လမ်း တွေကိုလည်း ပြောပြတတ်သူမို့ တူတူမတော်သူ ကလေးများက ချစ်ခင်ကြသည်။
တညနေတွင် ထိုလူကြီးက ကလေးများကို ရယ်စရာ ဇာတ်လမ်းတခု ပြောပြနေသည်။ မြန်မာစကားဖြင့် ပြောပြ နေခြင်းဖြစ်သည်။ တချက်တချက်လည်း အင်္ဂလိပ်လို ပါသေးသည်။ ဒါပေမယ့် ဇာတ်လမ်းတခုလုံး အင်္ဂလိပ် စကားနဲ့ ပြောနေသည်ဟု ထင်ရအောင် မြန်မာအသံထွက်တွေ နောက်မှာ “အက်စ် သံတွေ အက်ဖ် သံတွေ” ညှပ်၍ပြောကာ အသောဖောက်နေသေးသည်။ သူပြောနေတာက ဒီလို။
“လေကြီးစ် မိုးကြီးစ် ဝုန်းဒိုင်းစ်”
“သင်္ဘောကြီးစ် ပျက်စ်”
“မဟာဇနက အင်ဿ ဆီးစ်”
“ရက်ကန် ရက်ကန်စ် ဆဲဗင်းဒေးစ်”
“ယောက်ကျားတို့စ် လုံ့လကိုပြ — စ်”
“မေခလာ နတ်သမီးစ် ကယ်စ်”
“ဖိုင်နယ်လီး၊ ကျောက်ဖြာပေါ်ရောက်စ် ဘုရင်ဖြစ်စ်” ဟူ၍ ဖြစ်သည်။
ကလေးများကို အဲသလို နောက်ပြောင်၍ စကားလုံးများ ပုံဖျက်၍ ပြောနေသည်ကို အနီးအနားမှ ဆွေမျိုး လူကြီးတချို့လည်း မသိမသာ နားထောင်နေကြသည်။ ထို့နောက် ထိုလူကြီးများက ကွယ်ရာတွင် ဤသို့ မှတ်ချက်ချကြသည်။
“သူပြောနေတာတွေက အင်္ဂလိပ်လိုတွေ ဖြစ်နေလို့ အကုန်မသိပေမယ့် မှန်းလို့ရပါတယ်။ ဇာတ်တော်ကြီး ဆယ်ဘွဲ့ထဲက မဟာဇနက မင်းသား အကြောင်းကို ပြောနေတာ” ဟူသတတ်။
၎။ ရန်ကုန်အပြည်ပြည်ဆိုင်ရာ လေဆိပ်။ ဖိုးအောင်တယောက် သူ့ကုမ္ပဏီက လူတချို့နှင့် ဘန်ကောက်ကို အလုပ်ကိစ္စအတွက် သွားဖို့ ရောက်နေသည်။ ဖိုးအောင်အတွက် ဘန်ကောက်သွားခြင်းသည် ထမင်းစား ရေသောက်ပမာ ဖြစ်နေပြီ။ ဘန်ကောက် သွားရသည့် အခေါက်ပေါင်းလည်း မရေနိုင်တော့။
ဒီတခေါက်မှာ ဖိုးအောင်တယောက် ရေရေလည်လည် အရစ်ခံနေရသည်။ လေဆိပ် လုံခြုံရေး အရာရှိတဦးက ဖိုးအောင်ကို မောက်မောက်မာမာ မေးမြန်းနေသည်။
အရာရှိ။ ။ (လေသံမာမာဖြင့်) မင်းက ဘန်ကောက်ကို ဘာသွားလုပ်မှာလဲ။ ဟိုမှာ အလုပ်သွားလုပ်ဖို့လား။ ပြီးရင် ဘယ်နိုင်ငံကို ဆက်သွားဦးမှာလဲ။ မလေးတို့ဘာတို့ သွားဦးမှာလား။
ဖိုးအောင်။ ။ (ပုံမှန်အသံဖြင့်) ကျနော့် ကုမ္ပဏီကိစ္စနဲ့သွားမှာပါ။ အလုပ်ကိစ္စပြီးရင် ပတ်တရားတို့ ဘာတို့လည်း သွားလည်မယ်။ ဒီလောက်ပါပဲ။ ပြီးရင် ရန်ကုန်ပြန်လာမှာပါ။
အရာရှိ။ ။ မင်း ငါကို့ ဘတ်မယ် မကြံနဲ့။ မင်းလိုကောင်မျိုးတွေ ဒီလေဆိပ်ကနေ ဒီလိုအကြောင်းပြပြီး ထွက်ကြ တာ ငါတို့က အံတိုနေပြီ။
ဖိုးအောင်။ ။ (စိတ်အနည်းငယ်တိုလာ) ခင်ဗျား ကြိုက်သလိုစစ်၊ ကျနော့်မှာ ထိုင်းဗီဇာလည်း တရားဝင်ရှိတယ်။ တရားမဝင်တဲ့ ပစ္စည်း ဘာတခုမှလည်း ကျနော် သယ်မလာဖူး။ ကျနော့အိတ်ကို ခင်ဗျား ကြိုက်သလို စစ်နိုင် တယ်။ ဟောဒါက ကျနော့် ကုမ္ပဏီလိပ်စာကတ်။ ခင်ဗျား စုံစမ်းလို့ရတယ်။ နောက်ပြီး ကျနော့်မှာ လေယာဉ် လက်မှတ် အသွားအပြန်လဲ ရှိတယ်။ ဟောဒီမှာ။
စကားပြောရင်း ပြောရင်းဖြင့် အပေါက်အလမ်း သိပ်မတဲ့တော့။ ဖိုးအောင် ဂျင်းဘောင်ဘီ အိတ်ထဲ မိုဘိုင်းဖုံးကို ထုတ်လိုက်ပြီး အနည်းငယ် နောက်ကျနေသော သူ့ကုမ္ပဏီက လုပ်ဖော်ကိုင်ဖက် နှစ်ဦးကို ဆက်သွယ်လိုက် သည်။ ဖိုးအောင် မိုဘိုင်းဖုံးကို ထိုအရာရှိမြင်တော့ နည်းနည်း မျက်နှာပြောင်းသွားသည်။ ပြောင်းမှာပေါ့ ဖိုးအောင်ကိုင်ထားတဲ့ မိုဘိုင်းဖုံးက အခု မြန်မာနိုင်ငံမှာ ခေတ်စားနေတဲ့ ဈေးအကြီးဆုံးဆိုတဲ့ မိုဘိုင်းဖုံးကိုး။ မိနစ်ပိုင်းအတွင်း ဖိုးအောင်လူများလည်း ရောက်လာသည်။ သားသားနားနား ဝတ်ဆင်ထားသော ဟိုလူနှစ် ယောက်ကို မြင်တော့မှာ အရာရှိဆိုသူ သဘောပေါက်ပြီး ရစ်နေတာ ရပ်သွားသည်။ စောစောက ဖိုးအောင်ကို မင်းနဲ့ငါနဲ့ ပြောနေရာမှ ခင်ဗျားနဲ့ ကျနော်ဆိုပြီး ဖြစ်လာသည်။ တကယ်တန်း ဆိုရင် ဖိုးအောင်နဲ့ အဲသည့် အရာရှိ ဆိုသူက အသက်အားဖြင့် မတိမ်းမယိမ်းတွေ။ ဘာ့ကြောင့် ရိုင်းရိုင်းစိုင်းစိုင်း ဆက်ဆံရသနည်း။
ဖိုးအောင် သဘောပေါက်သွားသည်။ သူကတော့ ဘန်ကောက်ကို သွားလိုက်ပြန်လိုက် လုပ်နေတာ အခေါက် ပေါင်း များပြီမို့ အဝတ်အစားကို ဖြစ်သလို ဝတ်ထားသည်။ တီရှပ်က အနွမ်းကြီး မဟုတ်ပေမယ့် သစ်သစ်လွင် လွင်လည်း မဟုတ်။ ဂျင်းဘောင်းဘီက အကောင်းစားပေမယ့် တမင်ဟောင်းအောင် လုပ်ထားသည့် အမျိုးမို့ တဖက်လူအမြင်တွင် မှိန်တိန်တိန် ဖြစ်နေပြန်။ ထိုအခြေအနေကို မြင်ပြီး အရာရှိဆိုသူက တဖက်နိုင်ငံတွင် အလုပ်သွားမယ့် လူမျိုးဟု ထင်ကာ ဖိုးအောင်ထံမှ ကြားပေါက် ပိုက်ဆံရလိုရငြား မောက်မောက်မာမာ အာဏာ ပြ၍ ဆက်ဆံနေခြင်းဖြစ်သည်။ အကယ်၍ ဖိုးအောင်အနေဖြင့် အာဏာပိုင်မို့ ဦးကျိုးသွားမိပါက တဖက်က ပိုက်ဆံတောင်းတော့မည်။
ကျနော်တို့ ချစ်သော မြန်မာပြည်ကြီး ပြောင်းလဲဖို့ ဆိုရာမှာ ဒီမိုကရေစီ တခုထဲသာ မဟုတ်ပါ။ အရင်တလျှောက်လုံး အမြစ်တွယ်နေသည့် အကျိုးအပြစ် များလွန်းသည့် စိတ်နေစိတ်ထားများကိုလည်း ပြောင်း လဲဖို့ လိုသေးသည်။ ကြောက်တတ် လွန်းတာတွေလည်း မကြောက်တတ်ဖို့ ပြင်ဆင်ရမည်။ ပိုင်ပြီထင်ပြီး ပြောချင်ရာပြော လုပ်ချင်ရာလုပ် တာမျိုးတွေလည်း ပြင်ဆင်ရမည်။ ယုံလွယ်လွန်းသည့် စိတ်ကိုလည်း ပြင်ရ မည်။ ကိုယ်မတတ်ဘဲ မသိဘဲ ရှိတာတွေကို သိသလိုလို တတ်သလိုလို မလုပ်ကြဖို့လည်း ပြင်ဆင်ရဦးမည်။ အာဏာပြ မောက်မာတဲ့ စိတ်များကိုလည်း ပြောင်းရမည်။ စိတ်ကိုပြောင်းလဲရတာက ဒီမိုကရေစီ ပြောင်းလဲဖို့ အတွက် ဆိုတာထက် ပိုခက်မည်ဟု ပြောလိုသည်။ မခက်လိုပါက မျိုးဆက်သစ်များအတွက် ပညာရေးစနစ်ကို လွတ်လပ်သော ပညာရေးဖြစ်ဖို့ အရင်ဆုံး ပြောင်းလဲဖို့သာ ဖြစ်တော့သည်။ ပြောင်းလဲရေးတွေ အတွက် နောက်ဆုံး ဆိုက်သည့် လမ်းကတော့ လွတ်လပ်သော ပညာရေးစနစ်သာ ဖြစ်တော့သည်ဟု ပြောလိုသည်။
ဇော်မင်း
၂၆ ရက် မတ်လ ၂ဝ၁၂ ခုနှစ်
Friday, March 9, 2012
အပြောင်းအလဲတွေရှိပါတယ်
ဒုံ
ရင်းဒုံရင်းအတိုင်း နေနေရတဲ့ ကာလတွေ ကြာလာပြီဆိုရင် လူ့အဖွဲ့အစည်း တခုဟာ တိုးတက်မှု နောက်တခုခု အတွက် အာသာ ငမ်းငမ်းဖြစ်လေ့ ရှိပါတယ်။ အဲတာကို နောကြေနေတဲ့ အုပ်ချုပ်သူတွေ၊ ခေါင်းဆောင်တွေက အပြောင်းအလဲ လုပ်မယ် အားလုံး အတွက် အကျိုး ရှိစေရမယ်ဆိုပြီး အဲသလို အချိန်တွေမှာ လူတွေကို ဖမ်းစားလေ့ရှိပါတယ်။ လက်ရှိ အမေရိကန်သမ္မတ အိုဘားမားတောင် အပြောင်းအလဲ လိုနေပြီဆိုတဲ့ စကားလုံးကို အသုံးပြုပြီး သမ္မတ မဖြစ်ခင်မှာ ပေါ်ပြူလာဖြစ်လာခဲ့သေးတာ မဟုတ်လား။ လူဆိုတာ မပြောင်းမလဲဘဲ နေတာထက် အပြောင်းအလဲကို ကြိုက်တဲ့ သဘာဝရှိပါတယ်။ အခု ကျနော်တို့ မြန်မာပြည်မှာလည်း အပြောင်းအလဲတွေ စနေပြီလို့ အစိုးရကလည်း ပြောတယ်၊ တချုိ့တွေကလည်း ပြောတယ်မို့လား။
ကျနော်ပြောချင်တာက ကျနော်တို့ဆီက အပြောင်းအလဲကို ပြောချင်တာပါ။ ပြည်တွင်းကို ပြန်မရောက်တာ နှစ်ပေါင်း နှစ်ဆယ် ကျော်နေပြီမို့ ပြည်တွင်းက အကြောင်းနဲ့ အပြောင်းအလဲကို ကျနော်မပြောလိုပါ။ သို့သော် ကျနော်တို့ နယ်စပ်က အကြောင်းကို တော့ ပြောလိုပါတယ်။ ကျနော်တို့ နယ်စပ်က တိုင်းရင်းသား လက်နက်ကိုင် အဖွဲ့အစည်းတွေ အပါအဝင် အဖွဲ့အစည်း အသီးသီး မှာ အပြောင်းအလဲတွေ မရှိတာ ဆယ်စုနှစ် နှစ်ခုတိုင်ခဲ့ပါပြီ။ တချို့ တိုင်းရင်းသား အဖွဲ့တွေမှာတော့ အပြောင်းအလဲ တချို့ ရှိခဲ့ ပါတယ်။ ရှိတယ်ဆိုတာကလည်း စနစ်တကျ တဗိုလ်ကျ တဗိုလ်တက် ပုံစံမျိုး ရှိခဲ့တာတော့ မဟုတ်ပါ။ တသက်လုံး လူကြီးလုပ် လာသူတွေ၊ ဥက္ကဋ္ဌ အတွင်းရေးမှူး လုပ်လာတဲ့သူတွေ အသက်ကြီးလို့ ကွယ်လွန်တာ ကြောင့် ပြောင်းလဲတာမျိုးသာ ဖြစ်ပါ တယ်။ မြန်မာလူမျိုးတွေနဲ့ ဖွဲ့ထားတဲ့ နယ်စပ်က အဖွဲ့အစည်းတွေကတော့ အခုအထိ ပြောစမှတ် ပြုရလောက်တဲ့ အပြောင်း အလဲမျိုး မရှိသေးပါလို့ ပြောလိုပါတယ်။
ပြန်ကြည့်လိုက်ရင် လွန်ခဲ့တဲ့ အနှစ်နှစ်ဆယ်ကျော်က ခေါင်းဆောင်လုပ်တဲ့ လူတွေပဲ လူကြီးဆက်ဖြစ်နေဆဲပါ။ နေရာ ပြောင်း၊ အဖွဲ့နာမည်ပြောင်း၊ ရာထူးနာမည်သာ ပြောင်းတယ် ခေါင်းဆောင်ဆက်လုပ်နေတုန်းပါ။ တောခိုပြီး လက်နက်ကိုင် တိုက်လာတဲ့ ရဲဘော်တွေ၊ လက်နက်မကိုင်ပေမယ့် လက်နက်ကိုင် နယ်မြေထဲမှာ နှစ်အကြာကြီး ရှိခဲ့တဲ့သူတွေ ဘာကြောင့် တတိယ နိုင်ငံ တွေကို ထွက်သွားတာလဲ။ တော်လှန်ရေး ခရီးကြမ်းကို ဆက်မဖြတ်လိုတဲ့ ဆန္ဒကြောင့်လား။ အားကုန်သွား လို့လား။ ခိုင်မာတဲ့ ရည်မှန်းချက်တွေ မရှိတော့လို့လား စသဖြင့် မေးစရာတွေတော့ ရှိပါတယ်။ ဒါဖြင့်ရင် အနှစ်နှစ်ဆယ် ကျော်လုံး ခေါင်းဆောင် နေရာကို အခုထိ ရယူထားသူတွေက (တချို့ကိုဆိုလိုပါတယ်) သူများထက် ပိုကြံ့ခိုင်လို့ ဒီနေရာ တွေမှာ ဆက်ရှိနေတာလား ဆိုတာကလည်း မေးရမယ့် မေးခွန်း ဖြစ်လာပါတယ်။ ပြန်ကြည့်လိုက်ရင် ရာသက်ပန် ဥက္ကဋ္ဌ တွေ၊ ရာသက်ပန် အတွင်းရေးမှူး တွေ၊ ရာသက်ပန် ဘဏ္ဍာရေးမှူးတွေ၊ ရာသက်ပန် အတွင်းရေးမှူး အဖွဲ့ဝင်တွေဟာ ဒီလူတွေချည်းပါပဲ။ ခေါင်းဆောင်ရာထူးကို နှစ်နဲ့ချီပြီး ယူထားမှတော့ ဆက်ကျန်ရမှာကိုး။
ကျနော်မြင်တာတွေကို ပြောရမယ်ဆိုရင် အခွင့်အလမ်း ဆိုတဲ့ ကိစ္စက စတယ်လို့ ပြောလိုပါတယ်။ အခွင့်အလမ်း ရသူ တွေက မြန်မာပြည်ကို ကိုယ်စားပြုတဲ့ တော်လှန်ရေးခေါင်းဆောင်ကြီးတွေ အနေနဲ့ (အမျိုးသမီးတချို့လည်းပါ) နိုင်ငံတကာ ကိုသွား မြန်မာပြည်ကိစ္စကို တင်ပြ စတဲ့အလုပ်တွေကို လုပ်ခဲ့ကြရပါတယ်။ လော်ဘီလုပ်ငန်းလို့ ဒီဖက်မှာ အပြောများ ပါတယ်။ လုပ်ရင်းလုပ်ရင်းနဲ့ သူတို့တတွေဟာ နိုင်ငံတကာ အခြေအနေတွေကို တစိတ်တပိုင်း နားလည်လာပါတယ်။ နိုင်ငံတကာက ဘာကြိုက်တတ်တယ် ဆိုတာကိုလည်း သိလာပါတယ်။ အလှူရှင်ဒိုနာက ဘာမျိုးပြောမှ ဘယ်လိုမျိုးတင်ပြမှ သဘောကျတယ် ဆိုတာကိုလည်း နားလည်လာပါတယ်။ တခါ ကိုယ့်အဖွဲ့အစည်းမှာ ပြန်ရောက်ရင်လည်း ဒီလိုမျိုး ငွေတွေ ဘာတွေ ဝင်လာတာ ဟာ နိုင်ငံတကာအကြောင်း နားလည်တဲ့ သူတို့လို လူတွေလုပ်လို့သာ ရလာတယ် ဆိုတာမျိုး ဖြစ်လာ ပါတယ်။ အဲသည်တော့ သူတို့တတွေ နိုင်ငံတကာကို ထပ်ခါထပ်ခါ ထွက်ဖို့ ဖြစ်လာပါတော့တယ်။ သူတို့နဲ့ သူတို့ရဲ့ အလွမ်းသင့်တဲ့ အုပ်စုတွေသာ နိုင်ငံ တကာကို ခဏခဏထွက်ကြတာမို့ တခါမှ မထွက်ရတဲ့ သူတွေအဖို့ကတော့ သူတို့ကို မော့ကြည့်နေယုံကလွဲလို့ ဘာမှလည်း သိလာခြင်း၊ တတ်လာခြင်း၊ ကျွမ်းကျင်လာခြင်း မရှိပါ။ နယ်စပ်က သက်ဆိုင်ရာ အဖွဲ့အစည်းထဲမှာပဲ ရေဒီယိုသတင်းနဲ့ နိုင်ငံရေးအကဲဖြတ်တဲ့ အလုပ်လောက်မျိုးကို အာသာဖြေသလို လုပ်နိုင်တာပဲ ရှိပါတယ်။ အဲတာကြောင့် အထက်မှာ ပြောခဲ့တဲ့ အခွင့်အလမ်း ဆိုတာ ဒါမျိုးကို ဆိုလိုတာဖြစ်ပါတယ်။ အခွင့်အလမ်း မရတဲ့သူဟာ အခွင့်အလမ်း ရတဲ့သူလောက် တိုးတက် ဖြစ်ထွန်းလာဖို့ ဆိုတာ နှေးကွေးသလို အခက်အခဲလည်း ရှိပါတယ်။ ကျနော်သည်လည်း အခွင့်အလမ်း တချို့ ရခဲ့တဲ့ အဲသည့် အဝန်းအဝိုင်းမှာ တချိန်က ပါခဲ့ဖူးတယ် ဆိုတာကို ဝန်ခံလို ပါတယ်။ သို့သော် လူကြီးကြိုက် မပြောတတ် မနေတတ်တော့ အဲသည့်အလုပ်ဟာ ရေရှည်မမြဲခဲ့ပါဖူး။
နှစ်တွေကြာညောင်း လာတာနဲ့အမျှ အောက်ခြေက ရဲဘော်တွေဟာ နယ်စပ်ကအမြင့်နိုင်ငံရေး၊ အလှူရှင်ဒိုနာ နိုင်ငံရေး၊ နိုင်ငံတကာနိုင်ငံရေး စတဲ့ နယ်ပယ်တိုင်းနဲ့ အဆက်ပြတ်သလို ဖြစ်လာပါတယ်။ နိုင်ငံခြားက ခရီးထွက်ပြီး ပြန်လာတဲ့ ခေါင်းဆောင်တွေ ပြောသမျှနဲ့ တင်းတိမ်လာရပါတယ်။ သူတို့ပြောတာ ဟုတ်မှာပါဘဲပေါ့လေ။ တခါ အိမ်ထောင်တွေကျ ခလေးတွေလည်းရလာ ဆိုတဲ့ အခြေအနေလည်း ဖြစ်နေပါတယ်။ တချိန်ထဲမှာ ခေါင်းဆောင်တွေလည်း ဘာသားနဲ့မှ ထုထားတာ မဟုတ်တော့ သူတို့လည်း အိမ်ထောင်သည်တွေ ဖြစ်လာပါတယ်။ အဲသည်မှာ လူတန်းစား ကွာဟလာတာကို သူတို့တတွေ စပြီး ကြုံတွေ့ရတော့ တာပါပဲ။ တောထဲတုန်းက အားလုံးဟာ ဖိုကြီးကချက်တဲ့ မီးခိုးစော်နံတဲ့ထမင်း၊ ကြဲတောက် တောက် ငပိရေကို ခေါင်းဆောင်ငယ်သား မည်သူမဆို စားခဲ့ကြ ရတာပါ။ တောကနေထွက် ထိုင်းနိုင်ငံ နယ်စပ်က မြို့ပြလေး တွေကို ခိုလှုံလာရတဲ့ အချိန်မှာ ဘန်ကောက်သွားနိုင်သူ၊ နိုင်ငံခြားမှာ အစည်းအဝေးတက်နိုင်သူနဲ့ ဘယ်ကိုမှ မရောက်ဖူးတဲ့ သူတွေအကြားမှာ နှစ်ကြာလာတာနဲ့ အမျှ လူတန်းစားကွာဟာမှုဟာ ပိုပိုပြီး ကြီးမားလာခဲ့ ပါတယ်။
ဒီကြားထဲမှာ အန်ဂျီအို နိုင်ငံရေးကလည်း ကြီးထွားသထက် ကြီးထွားလာပါတယ်။ နိုင်ငံခြား သွားခွင့်ရတဲ့၊ အန်ဂျီအို အကြီးကြီး တွေဆီမှာ ငွေတောင်းနိုင်တဲ့ ခေါင်းဆောင်ဟာ ပိုပြီးအရေးပါလာပါတယ်။ အဲသလို ခေါင်းဆောင်မျိုးကလည်း နှစ်တွေသာ ကြာလာပေမယ့် ခေါင်းဆောင်မှု နေရာက ဆင်းပေးဖို့ (သို့မဟုတ်) ခေါင်းဆောင်မှုကို ဖြန့်ကြက်မျှဝေဖို့တောင် စိတ်ကူး မရှိကြတော့ပါဖူး။ သူတို့ တောင်းပေးနေတဲ့ ငွေနဲ့ အားလုံး အသက်ဆက်ပြီး စားနေရသလို ဖြစ်နေတာကိုး။ အဲသလို အန်ဂျီအို နိုင်ငံရေး ကြီးထွားလာတာဟာ နောက်ပိုင်းမှာ ပြည်တွင်းလုပ်ငန်းတွေနဲ့ပါ ဆက်စပ်လာ ပြန်ပါတယ်။ နယ်စပ်မှာတော့ အတွင်း လုပ်ငန်းဆိုရင် လူတိုင်းသဘော ပေါက်ပါတယ်။ မူလကထဲက လျှို့ဝှက်ရတဲ့ သဘာဝရှိတဲ့ အတွင်းလုပ်ငန်းဟာ ဒိုနာတွေကို ဘောက်ချာ ပြစရာမလိုပါဖူး။ ပြည်တွင်းက နာမည်ကြီးတဲ့ တချို့သော (အားလုံးကို မဆိုလိုပါ) နိုင်ငံရေးခေါင်းဆောင်၊ နိုင်ငံရေး လှုပ်ရှားသူ၊ တချို့သော ၁၉၉ဝ အမတ်များ စတာတွေဟာလည်း ပြည်ပနဲ့ နယ်စပ်က ပို့လိုက်တဲ့ ငွေတွေအပေါ်မှာ အမှီပြုလာ ရသလို ဖြစ်လာပါတယ်။ ပြည်တွင်းက တချို့သော သူတွေ အသုံးပြု နေတဲ့ လက်တော့ကွန်ပြူတာ၊ မိုဘိုင်းဖုန်း၊ ခရီးစရိတ် ဘာစရိတ် စတာတွေဟာ အဲသည်တုန်းက နယ်စပ်က ခေါင်းဆောင် တွေဆီကနေ လာတာတွေ ဖြစ်ပါတယ်။ တချို့ဆိုရင် ရန်ကုန်မှာ တိုက်ခန်း ဝယ်နိုင်တဲ့အထိ အထောက်အပံ့ ရခဲ့ပါတယ်။ အခု ကနေ့ကာလ ကိုတော့ ကျနော်မသိပါ။
အဲသည်တော့ ပြန်ကောက်ရရင် နိုင်ငံခြားကနေ ငွေရှာနိုင်သူ ခေါင်းဆောင်ဖြစ်စတန်း ဆိုတဲ့ အနေအထားမျိုး ဖြစ်လာပါ တယ်။ ဒါကို ဘယ်သူမှ မငြင်းနိုင်ပါဖူး။ ဘာကြောင့် ငွေရှာနိုင်တာလဲ့။ ဇာတ်လမ်းစကတဲကိုက နိုင်ငံတကာနဲ့ မလွဲမသွေ ဆက်ဆံရတဲ့ နေရာမျိုးမှာ အလုပ်လုပ်ရတဲ့၊ ခေါင်းဆောင်တွေ ဖြစ်လာခဲ့တဲ့ အခွင့်အလမ်းကြောင့် ဆိုရင် မမှားပါဖူး။ ကျန်တဲ့ သူတွေကကော ဘာဖြစ်လို့ အဲသလို မဖြစ်ရရှာတာလဲ။ တောခိုလာတုန်းက သူလည်း တက္ကသိုလ်ကျောင်းသား၊ ကိုယ်လည်း တက္ကသိုလ် ကျောင်းသားပဲ။ ပြင်ပနဲ့ နိုင်ငံတကာနဲ့ ဆက်ဆံဖို့ အင်္ဂလိပ်လို အပြောအဆိုနဲ့ ပတ်သက်ရင်လည်း ဤသူလည်း “မိုင်နိမ်းအစ် မောင်ဖြူ” ထိုသူလည်း “မိုင်နိမ်းအစ် မောင်ဖြူ” ပါပဲ။ သည်လောက်ပဲ တတ်ကြတာပါ။ ရောက်ခါ စတုန်းက ဘယ်သူမှ ထို့ထက်ပို မတတ်ပါ။ နည်းနည်းလောက် ပိုတတ်သူ အနည်းငယ်တော့ ရှိပါလိမ့်မယ်။ သို့သော် နောက်ပိုင်းမှာ အခွင့်အလမ်းကြောင့် အခွင့်အလမ်း ရသူတွေက အခွင့်အလမ်း မရသူတွေထက် ပိုပြီး ပြောတတ် ဆိုတတ် လုပ်တတ်ကိုင်တတ် ဖြစ်သွားတာပါ။ နှစ်ပေါင်းများစွာ အတွင်း အလုပ်က သင်သွားတာလို့ ပြောလို့ရပါတယ်။
မာနယ်ပလောကျအပြီး အဲသလို ထိုင်းနိုင်ငံ နယ်စပ်မြို့ကလေးတွေမှာ အနေကြာရင်း နိုင်ငံတကာကို ပေါက်ရောက်တဲ့ ခေါင်းဆောင်တွေက ဓနအရပါ ပေါ်ပေါ်တင်တင် ချမ်းသာလာပါတယ်။ အဖိုးတန်ကားတွေ ဝယ်စီးလာနိုင်ပါတယ် ကားစီး လာရတဲ့ အကြောင်းပြချက်ကတော့ အတွင်းကလူတွေ လာရင် ရန်သူ့ ထောက်လှမ်းရေး မသိအောင် ကြိုရပို့ရမှာ အတွက်လို့ ပြောပါတယ်။ ဈေးကြီးတဲ့ စားသောက်ဆိုင်တွေမှာ အဖိုးတန် အရက်တွေနဲ့ သောက်စားလာနိုင် ပါတယ်။ အတွင်းကလာတဲ့ အရေးကြီးတဲ့ သူတွေကိုဧည့်ခံတာလို့ ဆိုတယ်။ မချမ်းသာတဲ့ ခေါင်းဆောင် အနည်းငယ်လည်း ရှိပါသေးတယ်။ သို့သော် သူတို့က မချမ်းသာဘူး ဆိုပေမယ့် နေ့တိုင်း ဘီယာ သောက်နိုင်၊ အရက်သောက်နိုင်၊ စီးကရက်ခဲနိုင်ပါတယ်။ ဘတ်နှစ်ဆယ် သုံးဆယ်ဖိုး ကွမ်းယာဘူးတွေကို ခါးကြားမှာ လိပ်ထားပြီး တချိန်လုံး ကွမ်းဝါး နိုင်ပါတယ်။ လက်တော့ကွန်ပြူတာ ကိုယ်ပိုင် ရှိပါတယ်။ ကိုယ်ပိုင် မိုဘိုင်းဖုန်းကိုလည်း အကန့်အသတ်မရှိ ပြောနိုင်ပါတယ်။ နိုင်ငံခြား မဟုတ်ရင်တောင် ထိုင်းနိုင်ငံ အတွင်း မှာ ချင်းမိုင်၊ ဘန်ကောက်လောက်အထိ အနည်းဆုံး သွားဖို့ အခွင့်အရေး ရပါသေးတယ်။ မြန်မာနိုင်ငံကူး လက်မှတ်တွေလည်း ဝယ်ကိုင်နိုင်ပါတယ်။ အဲတာတွေ ဗီဇာသက်တန်း ဆက်ဖို့လည်း ငွေရှိပါတယ်။ ဒီကြားထဲ အဟွာတွေရှိတဲ့ ကာရာအိုကေ ကို လည်း သွားနိုင်ကြပါတယ်။ ရဲဘော်တွေကတော့ ထမင်းနပ် မှန်ယုံကလွဲလို့ ဘာမှ အပိုသုံးဖို့ မရှိခဲ့ပါ။ ဗမာဖက်ကမ်းက လာရောင်းတဲ့ ဆေးပေါ့လိပ်သာ သောက်နိုင်သူတွေ ဖြစ်ပါ တယ်။ နောက်ဆုံး တချိန်မှာတော့ ကလေးတို့လို့တွဲလောင်းနဲ့ အဲသည့် ကလေးတွေကို ကျောင်းတောင် ကောင်းကောင်း မထားနိုင်တဲ့ ရဲဘော်တွေဟာ တတိယ နိုင်ငံတွေကို ထွက်ခွာဖို့ ဆုံးဖြတ်ရပါတော့တယ်။
နယ်စပ်က အင်အားတွေ ဘာကြောင့် နိုင်ငံခြားရောက်ကုန် ရတာလဲ ဆိုတာကို အကျဉ်းချုံးပြီး ပြောပြတာပါ။ အကျယ် ပြောရ မယ်ဆိုရင် သည့်ထက် ပြောနိုင်ပါသေးတယ်။ တနေ့တော့ ပြန်ပြော ပြန်ရေးဖို့လည်း စီစဉ်ထားပါတယ်။ ခေါင်းဆောင် လုပ်ခဲ့သူ များနဲ့ လက်ရှိခေါင်းဆောင် လုပ်နေသူများကို ဆော်ခြင်လို့၊ တွယ်ခြင်လို့ ပြန်ရေးမှာ မဟုတ်ပါ။ နယ်စပ် အခြေပြု တဲ့ တော်လှန် ရေး ဘာကြောင့် ကျရှုံးခဲ့ရသလဲ ဆိုတာကို အများသူငါတွေ၊ နောင်လာနောက်သားတွေ သင်ခန်းစာ ရစေဖို့ ရည်စူးပြီး ပြောမှာ ရေးမှာ ဖြစ်ပါတယ်။
ကိုင်း အဲသည်တော့ ကနေ့ နယ်စပ်မှာ အခြေစိုက်နေတဲ့ မြန်မာအဖွဲ့အစည်းတွေမှာ ဘာတွေ အပြောင်းအလဲ ရှိလာပြီလဲ။ ခေါင်းဆောင်မှုမှာတော့ ဘာမှ အပြောင်းအလဲ မရှိပါ။ ဒီလူနဲ့ ဒီလူပါပဲ။ သို့သော် တကယ်ပြောင်းလဲ နေတာတွေ မရှိဘူး လားဆိုရင်တော့ ရှိတယ်လို့ ပြောရဦးမှာပါ။ တကယ်လည်း ပြောင်းနေပါတယ်။ နောက်လိုက် ရဲဘော်တွေ တတိယနိုင်ငံ ရောက်လို့ အင်အားနည်းနေတာတောင် ဘယ်လို အပြောင်းအလဲမျိုး ဖန်တီးနိုင်သလဲ၊ ရှိနေသလဲ ဆိုတာ လူတွေက သိချင်မှာ ပါ။ အခု နယ်စပ်က အမျိုးသားခေါင်းဆောင်တွေ၊ အမျိုးသမီး ခေါင်းဆောင်တွေ နောက်မှာ မားမားမတ်မတ်နဲ့ လောက်လောက် လားလား အင်အား ဘယ်လောက် ရှိသေးသလဲလို့ မေးလာရင် ကျနော်က အားမနာဘဲ ဖြေမှာပါ။ အထင်မသေးနဲ့ ရှိပါသေး တယ်။ ခေါင်းဆောင် တယောက်နောက်မှာ အနည်းဆုံးတော့ ကွန်ပြူတာ နှစ်လုံးသုံးလုံးတော့ ရှိမှာပါလို့။ အင်တာနက် ခေတ်ကိုးဗျ။ လူများများ မလိုဖူးလေ။ လူများများ အင်အားများများနဲ့ အလုပ်လုပ်နေတယ်၊ ရှိတယ်လို့ အများက ထင်ရအောင် အင်တာနက်ကတဆင့် လုပ်နိုင်တာကိုး။ ကျန်တာတွေတော့ မသိဖူး အင်တာနက် တွင်တွင် သုံးနိုင်တာကိုက အပြောင်းအလဲ မို့လား။ ဒါကြောင့် ပြောတာပေါ့ ကျနော့်တို့ ဆီမှာလည်း အပြောင်းအလဲ ရှိပါတယ်။
ဇော်မင်း
၉ ရက်၊ မတ်လ၊ ၂ဝ၁၂ ခုနှစ်
Subscribe to:
Posts (Atom)
